ԱՀ և ՀՀ մշակույթի նախարարությունների ու Հայ օգնության միության նախաձեռնությամբ՝ Ստեփանակերտի Սայաթ-Նովայի անվան երաժշտական քոլեջում մայիսի 30-ին տեղի է ունեցել ամերիկահայ անվանի դաշնակահար Շահան Արծրունու «Մտորումներ ստեղնաշարի առջև» խորագրով բարեգործական համերգը:
Աշխարհահռչակ դաշնակահար Շահան Արծրունին համերգով հանդես է եկել Ստեփանակերտում
ՍՏԵՓԱՆԱԿԵՐՏ, 31 մայիսի, ԱՐՑԱԽՊՐԵՍ: Համերգային ծրագրի ընթացքում մեծ դաշնակահարը կատարել է Կոմիտասի, Էդվարդ Միրզոյանի, Ալան Հովհաննեսի, Բեթհովենի, Շուբերտի, Շոպենի ստեղծագործություններից:
«Արցախպրես»-ի թղթակցի հետ զրույցում Շ. Արծրունին ասել է, որ շատ ուրախ է իր հերթական այցելության ընթացքում տեսնել, թե Արցախն ինչքան է փոխվել: «Ստեփանակերտում տեսա գեղեցիկ շենքեր, մարդաշատ փողոցներ, մշակութային նոր կենտրոններ, ինչը շատ ոգևորիչ էր»,- ասել է դաշնակահարը և հավելել, որ Ստեփանակերտի մշակութային կրթօջախներում տեսել է նաև երաժշտարվեստի զարգացման համար անհրաժեշտ ժամանակակից պայմաններ, երաժշտական նոր գործիքներ:
«Լսել էի արցախցի տաղանդավոր երեխաների մասին, ովքեր բարձր մակարդակով են ներկայացնում հայ երաժշտարվեստը տարբեր միջազգային բեմերում: Այժմ համոզվեցի, որ այն արդյունք է հետևողական աշխատանքի և պայմանների ու համապատասխան միջավայրի ստեղծման, ինչը շատ կարևոր է յուրաքանչյուր ստեղծագործողի համար»,- ասել է Շ. Արծրունին: Անդրադառնալով Ստեփանակերտում անցկացված իր համերգին՝ ամերիկահայ դաշնակահարը նշել է, որ շատ տպավորված է հանդիսատեսի ընդունելությունից:
«Ես շատ գրագետ հանդիսատես տեսա, ով ոչ միայն ճիշտ ընկալեց և հասկացավ իմ մատուցած երաժշտությունը, այլև ջերմ ծափահարություններով ընդունեց իմ համերգը: Դա ինձ ոգևորեց և կրկին համերգային ծրագրով վերադառնալու մասին մտածելու կամք տվեց»,- նշել է Շ. Արծրունին:
Հավելենք, որ անվանի դաշնակահարը Ստեփանակերտի Սայաթ-Նովայի անվան երաժշտական քոլեջում վարպետության դասեր է տվել, իսկ համերգային ծրագրին ընդգրկել էր նաև քոլեջի սաներին:
Նշենք, որ Շահան Արծրունին ծնվել է Ստամբուլում, 1943 թվականին, ապրում է ԱՄՆ-ում: Ստամբուլի կոնսերվատորիան ավարտելուց հետո 1964 թվականին Գյուլբենկյան կրթաթոշակով հաճախել է Նյու Յորքի «Julliard» կոնսերվատորիան։
Համերգային գործունեությունից բացի, Շահան Արծրունին հայտնի է նաև՝ իբրև ազգային էթնիկ երաժշտության մեկնաբան, մանկավարժ, գրող և պրոդյուսեր։Իր ձայնագրություններով ու կատարումներով դաշնակահարը մասնակցել է ամերիկյան հեռուստատեսության PBS կայանի «Around the world in 82», «Gala of stars» և «A place of dreams: Carnegie Hall at 100» նշանավոր հաղորդումներին, ձայնագրվել է եվրոպական ռադիոներում, նրա կատարումներն ընդգրկված են BBC-ի երաժշտական ֆոնդում։
Համերգներ է ունեցել նշանավոր բեմերում, նվագել է Սպիտակ տանը, Անգլիայի, Դանիայի, Շվեդիայի և Իսլանդիայի թագավորական պալատներում։ Դասախոսել է Հարվարդի, Կոլումբիայի և Միչիգանի համալսարաններում, իսկ հայկական շարականների մասին դասախոսությամբ հանդես է եկել Կոնգրեսի գրադարանում։
1996 թվականին Ամենայն Հայոց կաթողիկոս Գարեգին Ա-ն Շահան Արծրունուն պարգևատրել է «Ս. Սահակ և Ս. Մեսրոպ» բարձրագույն շքանշանով։ Ունի 24 ձայնասկավառակ։ Դաշնակահարն աջակցում է Հայաստանում անցկացվող տարբեր ծրագրերի, Արամ Խաչատրյանի տուն-թանգարանի ու Վանաձորի Տարեցների տան հիմնական հովանավորներից է։