Արցախի պետական համալսարանում այսօր հյուրընկալվել է ՀՀ պաշտպանության նախարարի մամուլի քարտուղար, ռազմական վերլուծաբան-փորձագետ Արծրուն Հովհաննիսյանը:
Արծրուն Հովհաննիսյանն Արցախի պետական համալսարանում խոսել է ռազմական լրագրության մասին
ՍՏԵՓԱՆԱԿԵՐՏ, 5 հունիսի, ԱՐՑԱԽՊՐԵՍ:«Արցախպրես»-ի թղթակցի հաղորդմամբ՝ հանդիպմանը բացման խոսքով հանդես է եկել ԱրՊՀ ուսանողների հետ տարվող աշխատանքների գծով պրոռեկտոր Վիտյա Յարամիշյանը, ով կարևորել է Ա. Հովհաննիսյանի գործունեությունը հայկական ռազմական լրատվության ոլորտում:
Ա. Հովհաննիսյանը ուսանողների հետ կիսվել է ռազմական լրագրության ոլորտում ունեցած իր փորձառության մասին:
«Տեղեկատվությունը պետք է դիտարկել, որպես ռազմավարություն: Եթե ադրբեջանական կողմն այն ծառայեցնում է բացառապես սեփական կորուստների ու ճգնաժամային իրավիճակների կեղծման համար, ապա հայկական կողմի համար այն առավելապես հանրությանը տեղեկացված պահելու գործառույթ է իրականացնում,-ասել է Ա. Հովհաննիսյանը և ավելացրել,- տևական ժամանակ է, ինչ ՊՆ-ն ռազմական լրագրողների վերապատրաստման դասընթացներ և հավաքներ է կազմակերպում. միայն այսպիսի միջոցառումներով կարող ենք ռազմական ոլորտի լրագրողներ պատրաստել՝ այդպիսով ուղղորդելով նաև նրանց գործունեությունը ոչ միայն արտակարգ իրավիճակներում, այլև խաղաղ պայմաններում: Կիրթ ռազմական լրագրողն առաջնագծից կարող է վերադառնալ հարուստ և ազգային անվտանգության հայեցակարգին չհակասող ինֆորմացիայով, բայց և արձանագրել թերություններ, որոնք երբեք չենք հրապարակի: Մենք պետք է միշտ գիտակցենք, որ մեր ունեցած գիտելիքը մեր ամենաուժեղ զենքն է»:
Այն հարցին թե ինչքանով է հավանական պատերազմի վերսկսումն Ա. Հովհաննիսյանն պատասխանել է. «Տարվա սկզբին էլ հակառակորդը փորձեց իր սադրիչ գործելաոճն շարունակել, բայց այն չստացվեց շնորհիվ հայկական զինված ուժերի պատրաստվածության աստիճանի: Վերջին շրջանում սահմանին իրավիճակն գնահատում եմ ստաբիլ, սակայն միշտ պետք է զգոն լինենք»:
Հանդիպմանը Ա. Հովհաննիսյանը պատասխանել է համալսարանի պրոֆեսորադասախոսական կազմի և ուսանողների հարցերին, լսել նրանց մտահոգություններն ու առաջարկությունները:
