ԱՀ մշակույթի և երիտասարդության հարցերի նախարարության և «Ապագա սերունդների հիմնադրամ»-ի համատեղ նախաձեռնությամբ հուլիսի 1-ից Շուշիում մեկնարկել է «Հակոբ Գյուրջյան» քանդակագործության 5-րդ միջազգային սիմպոզիումը:
Շուշիում ընթանում է քանդակագործության 5-րդ միջազգային սիմպոզիումը (լուսանկարներ)
ՍՏԵՓԱՆԱԿԵՐՏ, 5 հուլիսի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Շուշիի կերպարվեստի պետական թանգարանի տնօրեն Լուսինե Գասպարյանն ասել է, որ «Հակոբ Գյուրջյան» քանդակագործության 5-րդ միջազգային սիմպոզիումին Հնդկաստանից, Եգիպտոսից, Սերբիայից, Հայաստանից և Արցախից մասնակցում է 10 քանդակագործ:
«Մասնակիցները Ասկերանի շրջանի Սզնեք գյուղից բերված մարմարացված կրաքարերի վրա տարբեր քանդակներ են կերտում. ավարտելուց հետո դրանք տեղադրվելու են Շուշիի կերպարվեստի պետական թանգարանին կից «Քանդակների պուրակ»-ում»,-նշել է Լ. Գասպարյանը:
Լ. Գասպարյանի խոսքով՝ մասնակիցները շատ դժվարությամբ են կտրվում իրենց աշխատանքից: Ունենք մասնակիցներ, ովքեր երկրորդ անգամ են մասնակցում սիմպոզիումին:
«Այս սիմպոզիումի առանձնահատկությունն այն է, որ, մեկ անգամ այցելելով Արցախ և մասնակցելով միջոցառմանը, հաջորդ տարիներին իրենք , անպայման, մասնակցության հայտեր են ներկայացնում. դրանք, միանշանակ, շատ կարևոր են: Անցկացված 4 սիմպոզիումների ժամանակ քանդակագործներ ենք ունեցել Բելգիայից, Բելոռուսիայից, Խորվաթիայից, Շվեյցարիայից, ԱՄՆ-ից, Ճապոնիա, Չինաստանից, Լեհաստանից և շատ այլ երկրներից: Միայն Իտալիայից մասնակցել է 19 աշխարհահռչակ պրոֆեսոր քանդակագործ»,-հավելել է Լ. Գասպարյանը:
Սերբիացի քանդակագործը մեզ հետ զրույցում ասել է, որ ինքն առաջին անգամ է Արցախում:
«Շատ գեղեցիկ երկիր է Արցախը, այստեղի մարդիկ շատ բարի են, հյուրասեր: Ես զարմացած եմ, որ այսպիսի փոքր քաղաքը, ինչպիսին Շուշին է, ունի այսպիսի մշակութային կենտրոններ. դրանք բավականին լավ հարթակ են՝ աշխարհի տարբեր երկրների մշակութային գործիչներին համախմբելու և միավորելու համար: Պատմության գիրք եմ քանդակում. այն կներկայացնի գիտության և մշակույթի շերտերը, ասեմ որ ստեղծագործելիս ներշնչանք եմ ստացել հայկական մշակույթից»:
Եգիպտացի քանդակագործն էլ, խոսելով իր տպավորությունների մասին, նշել է, որ ինքը շատ ուրախ է նման գեղեցիկ միջոցառմանը մասնակցելու համար և բավականին տպավորված է Արցախով և արցախցիներով:
«Դուք հպարտ պիտի լինեք, որ ունեք այսպիսի հիանալի երկիր: Ես որոշելու եմ պատրաստել յուրահատուկ մի քանդակ-ճեպանկար և այն սիրով նվիրելու եմ ձեզ՝ ձեր հրաշք երկրին: Ես եղել եմ նաև Ղազանչեցոց Սուրբ Ամենափրկիչ եկեղեցում: Այստեղ մարդիկ խաղաղ են, ուրախ: Ես ինձ այստեղ անվտանգ եմ զգում»,-անկեղծացել է եգիպտացի քանդակագործը:
Իսկ հնդիկ քանդակագործն էլ ասել է, որ ինքն առաջին անգամ Արցախ է եկել 2014 թվականին:
«Այստեղ բարի և կամեցող մարդիկ են ապրում. Արցախում ոգի կա: Ես Արցախում արդեն ձեռք եմ բերել ընկերներ: Զարմանալին այն է, որ ես արցախցիների և հնդիկների միջև նմանություններ եմ նկատում. նույնիսկ բառեր կան, որոնք իրար շատ նման են: Ես շատ եմ հավանել ձեր ճաշատեսակները. դրանք բազմազան են ու համեղ:
Իսկ մեզ հանդիպած մյուս հնդիկ քանդակագործը, ով առաջին անգամ է Արցախում,իր տպավորությունների մասին այսպես է ասել. «Հիասքանչ բնություն ունեք: Ես զբոսնել եմ Ստեփանակերտի Վերածննդի հրապարակում. տպավորությունս այնպիսին է, թե ես Եվրոպայում եմ: Արցախի մասին լսածս տեսածիս հետ չի համապատասխանում:
Իրականում այստեղ մարդիկ ապրում են, ստեղծագործում, արարում. ամենուր կյանքը հորդում է:
Սա մի երկիր է, որտեղ զբոսաշրջիկները կարող են ապահով ու անվտանգ զգալ և լիարժեք հանգստանալ»:
Սիմպոզիումի մասնակիցներին չի հետաքրքրում, որ իրենք կարող են հայտնվել Ադրբեջանի «Սև ցուցակում»: Նրանք այն կարծիքին են, որ մշակույթը կարող է օգնել տարբեր ազգերի մերձեցմանը:
Տեղեկացնենք նաև, որ հուլիսի 20-ին տեղի է ունենալու «Հակոբ Գյուրջյան» քանդակագործության 5-րդ միջազգային սիմպոզիումի փակման արարողությունը: