Սեպտեմբերի 4-ի առավոտյան Համբուրգից Երևան են վերադարձել աշխարհի առաջնությանը մասնակցած հայաստանցի բռնցքամարտիկները:
Դավիթ Թորոսյան. Բաչկովն արժանի է այս մեդալին
ՍՏԵՓԱՆԱԿԵՐՏ, 4 սեպտեմբերի, ԱՐՑԱԽՊՐԵՍ: Հավաքականի գլխավոր մարզիչ Դավիթ Թորոսյանի ղեկավարությամբ Գերմանիայի ռինգում Հայաստանը ներկայացրել են Կարեն Տոնականյանը (60 կգ) և Հովհաննես Բաչկովը (64 կգ): Եվրոպայի գործող չեմպիոն Հովհաննես Բաչկովը նվաճել է բրոնզե մեդալ՝ կիսաեզրափակչում զիջելով Կուբան ներկայացուցիչին:
«Զվարթնոց» օդանավակայանում Դավիթ Թորոսյանը զրուցել է ՀԱՕԿ լրատվականի հետ.
«Եվս մեկ անգամ շնորհավորում եմ Բաչկովին: Իհարկե, կցանկանայի, որ նա աշխարհի չեմպիոն դառնար, բայց տվյալ պահին բրոնզե մեդալն արտացոլում է մեր իրական սպասումները: Պետք է հաշվի առնել, որ Եվրոպայի և աշխարհի առաջնությունների միջակայքն ընդամենը մեկ ամիս էր: Բաչկովը բավականին ժամանակ չուներ վերականգնվելու համար: Եվ դա Եվրոպան ներկայացող բոլոր բռնցքամարտիկներին է վերաբերում:
Բավական է աչքի անցկացնել աշխարհի առաջնության արդյունքները: Եվրոպայի ներկայացուցիչները տասը քաշային կարգերից ընդամենը երեքում հաղթեցին: Մյուս մայրցամաքների առաջնություններն ավարտվել են դեռ մարտին: Նոր մարզավիճակի գագաթնակետին հասնելու համար առնվազն մեկուկես ամիս է պահանջվում: Մենք պարզապես ժամանակ չունեինք: Չեմ ցանկանում միջազգային ֆեդերացիայի գործողությունների մասին ասել, թե կանխամտածված են, բայց այդ ամենը տարօրինակ է: Այնպիսի տպավորություն է, որ մրցաշարային օրացույցը դիլետանտներն են կազմել:
Ամեն դեպքում ուրախ եմ Բաչկովի համար, նա արժանի է այս մեդալին: Մրցավարությունը Համբուրգում նորմալ էր: Կիսաեզրափակիչ մենամարտում Կուբայի ներկայացուցչի հետ Բաչկովը պարտվեց, բայց չեմ կարող նրան ինչ-որ բանում մեղադրել: Բաչկովն իսկական ճակատամարտ տվեց, մինչդեռ մյուս մրցակիցներին կուբացի բռնցքամարտիկը հաղթել էր նկատելի առավելությամբ: Նա իսկապես բոլորից ուժեղ էր և աչքի էր ընկնում Համբուրգում:
Հիմա բոլորս հոգնած ենք: Լարված ժամանակները անցյալում են: Մրցաշրջանը մեծ հաշվով ավարտված է: Կհանգստանանք, հետո ուշադրություն կդարձնենք պրոֆեսիոնալ ռինգին: Բռնցքամարտիկները հիմա կարող են համատեղել ելույթները սիրողական և պրոֆեսիոնալ ռինգերում, ինչը ես շատ դրական եմ գնահատում»,-ասել է Դավիթ Թորոսյանը: