Այսօր՝ սեպտեմբերի 28-ին, տեղի է ունեցել ԱՀ պետական նախարար Արայիկ Հարությունյանի մամուլի ասուլիսը:
Արցախի ՀՆԱ-ն աճել է շուրջ չորս անգամ. Արայիկ Հարությունյանն ամփոփել է անցած 10 տարվա արդյունքները
ՍՏԵՓԱՆԱԿԵՐՏ, 28 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ Ա. Հարությունյանը ամփոփելով իր ղեկավարած կառավարության անցած 10 տարիների գործունեությունը, մասնավորապես ասել է, որ այդ տարիների ընթացքում կառավարությունը, առաջնորդվելով նախագահ Բակո Սահակյանի նախընտրական ծրագրերով, տարեցտարի ապահովել է ՀՆԱ-ի աճ՝ ավելացնելով պետական բյուջեն ու կյանքի կոչելով սոցիալական շատ ծրագրեր:
«Այսպես, օրինակ, եթե 2007 թվականին հանրապետության ՀՆԱ-ն կազմում էր 70,8 մլրդ դրամ, 2016թ.՝ 229,6 մլրդ, ապա 2017 թվականին այն կանխատեսվում է հասցնել շուրջ 270 մլրդ-ի՝ տասը տարում ապահովելով անվանական ՀՆԱ-ի գրեթե 4 անգամ աճ: Եթե 2007թ. արդյունաբերական արտադրանքի ծավալը կազմել է 22,4 մլրդ դրամ, 2016 թվականին՝ 59 մլրդ, ապա 2017 թվականին այն անցնելու է 70 մլրդ-ը»,- ասել է Ա. Հարությունյանը:
Անդրադառնալով ըստ ուղղությունների ՀՆԱ-ի աճի ցուցանիշներին՝ Ա. Հարությունյանը նշել է, որ 2007 թվականին արդյունաբերական արտադրանքի ծավալը հանրապետությունում կազմում էր 22.4 միլիարդ դրամ, 2016 թվականին այն հասել է 59 միլիարդ դրամի, իսկ 2017 թվականին այն հատելու է 70 միլիարդ դրամի սահմանը:
Իսկ մշակվող ադյունաբերության ոլորտում 2007 թվականին 7-8 միլիարդ դրամի փոխարեն, 2012 թվականին ունեցել ենք 19 միլիարդ դրամ, իսկ 2016 թվականին 19.4 միլիարդ: Ա. Հարությունյանը շեշտադրել է, որ լուրջ տնտեսական աճ է արձանագրվել նաև գյուղատնտեսության բնագավառում՝ 2,9 անգամ ավելացնելով գյուղատնտեսական համախառն արտադրանքը: Եթե 2007 թվականին արձանագրվել է հացահատիկային մշակաբույսերի 53,000 տոննա բերք, ապա 2017 թվականին այն կազմել է 150,000 տոննա:
Պետնախարարն անդրադարձել է նաև շինարարական ծավալների ավելացման, կենսական անհրաժեշտության ենթակառուցվածքների վերականգնման և զարգացման մի շարք այլ ծրագրերի:
Ա. Հարությունյանը կարևոր ձեռքբերումներից է համարել նաև փոքր հիդրոէլեկտրոկայանների կառուցումը: 2016 թվականին մոտ 3.8 անգամ ավելացել է էլեկտրաէներգիայի արտադրության ծավալը: 90.4 միլիոն կՎտ/ ժամից հասել է 348 միլիոնի, իսկ առաջիկա տարիներին այդ ցուցանիշը կհասնի 700 միլիոն կՎտ/ ժամի:
Ամփոփելով հիմնական ցուցանիշները՝ Ա. Հարությունյանը նշել է, որ աճի նշված բոլոր ցուցանիշներն արտահայտվել են պետական բյուջեի եկամուտների ավելացմամբ՝ 2007թ.-ի 30 մլրդ դրամի փոխարեն 2017թ.-ին այն կհասնի 100 մլրդ դրամի:
