Այսօր Ստեփանակերտի Վերածննդի հրապարակում տեղի է ունեցել «Գութան» ազգագրական երգի-պարի փառատոնը:
Ստեփանակերտում տեղի է ունեցել «Գութան» ազգագրական երգի-պարի փառատոն (լուսանկարներ)
ՍՏԵՓԱՆԱԿԵՐՏ, 4 հոկտեմբերի, ԱՐՑԱԽՊՐԵՍ:«Արցախպրես»-ի թղթակցի հետ զրույցում«Գութան» ազգագրական երգի-պարի փառատոնի պատասխանատու, ժողովրդական երգիչ Արսեն Գրիգորյանը (Մրո) ասել է, որ արցախցին սիրում է այն երգն ու պարը, որ կապված է հայի ինքնության և արմատների հետ:
««Գութան» ազգագրական երգի-պարի փառատոնին մասնակցում է շուրջ 200 հոգի: Այն կարևոր առաքելություն ունի՝ հայության շրջանում տարածել ազգային երգն ու պարը: Մենք Արցախ ենք բերել այն մշակույթը, որը ներկայացնում է ամբողջական Հայաստանը՝ սկսած Կիլիկյան Հայաստանից մինչև Արցախ աշխարհ, Լոռիից մինչև Սյունիք: Բեմի վրա հայկական երգով ու պարով պատկերելու ենք Հայաստանի ամբողջական քարտեզը: Յուրաքանչյուր խումբ շատ հարուստ ծրագիր է ներկայացնում: Մենք ուղղակի գեղագիտական հաճույք պատճառելու մասին չենք մտածում. մեզ համար շատ կարևոր է մատուցել մեր ինքնության, ազգային պատկանելիության հետ կապված երաժշտությունը: Այս տարի մենք մեր փառատոնի ձևաչափը փոխել ենք՝ համերգային ծրագրով հանդես գալով նաև Քարվաճառում, Բերձորում, Մատաղիսում, Մարտակերտում, Հադրութում, Ասկերանում, Ճարտարում՝ այդ կերպ փորձելու համար մեր հայրենակիցներին հաղորդակից դարձնել համար ազգային երգ ու պարին,-ասել է Ա. Գրիգորյանը և հավելել,-Արցախում փառատոնի իրականացմանն աջակցել է «Գագիկ Ծառուկյան» բարեգործական հիմնադրամը»:
ԱՀ մշակույթի, երիտասարդության հարցերի և զբոսաշրջության նախարար Սերգեյ Շահվերդյանն էլ ընդգծել է, որ ինքը կարևորում է «Գութան» ազգագրական երգի-պարի փառատոնի անցկացումը:
«Չնայած անձրևային եղանակին, մարդիկ հավաքվում են հրապարակում: Սա ապացույց է այն բանի, որ հանրության մեջ փառատոնը մեծ պահանջարկ ունի: Մենք ողջունում ենք ցանկացած բարեգործական միջոցառում՝ ուղղված հայկական մշակույթի զարգացմանը»,- նշել է Ս. Շահվերդյանը:
Փառատոնին ներկա Ալվարդ Սարգսյանն էլ մեզ հետ զրույցում ասել է. «Որպես երիտասարդ շատ եմ կարևորում Արցախում նման միջոցառումների անցկացումը: Խորհրդային Միության տիրապետության տակ գտնվելու 70 տարիների ընթացքում մենք ազգագրական երգեր և պարեր ներկայացնելու իրավունք չունեինք: Նման փառատոների միջոցով է վեր հանվում հայի գենը: Ուզում եմ հատուկ շնորհակալություն հայտնել «Գագիկ Ծառուկյան» բարեգործական հիմնադրամին՝ նման գեղեցիկ նախաձեռնություններ հովանավորելու համար, որոնց կարիքը, իրոք, շատ է զգացվում: Բոլորս էլ պետք է մասնակիցը լինենք նման միջոցառումների»:
