Ստեփանակերտի Վերածննդի հրապարակում կայացել է «Գութան» ազգագրական երգի-պարի փառատոն:
Ստեփանակերտում կայացել է «Գութան» ազգագրական երգի-պարի փառատոն
ՍՏԵՓԱՆԱԿԵՐՏ, 4 հոկտեմբերի, ԱՐՑԱԽՊՐԵՍ: «Գութան» ազգագրական երգի-պարի փառատոնային համերգին իրենց մասնակցությունն են ունեցել՝ «Մարաթուկ», «Ակունք», «Կարին», «Սասնա Ծռեր», «Վերադարձ», «Մենք ենք մեր սարերը», «Մշո հավքեր», «Վան», «Տարոնցիներ», «Ծովակ», «Ոստան», «Գորանի», «Մասունք», «Տավրոս» երգի-պարի համույթները:
«Արցախպրես»-ի թղթակցի հետ զրույցում «Կարին» ավանդական երգի-պարի խմբի հիմնադիր և գեղարվեստական ղեկավար, նախկին ազատամարտիկ, պարուսույց Գագիկ Գինոսյանը հպարտությամբ նշել է, որ ինքը ողջունում է հայ մարդու՝ իր մշակույթի ակունքներին վերադառնալու փորձը. չէ՞-որ յուրաքանչյուր ազգի ինքնությունը հենց մշակույթով է ճանաչվում:
Գ. Գինոսյանի խոսքով, այս փառատոնի հիմնական նպատակն է ավանդական երգ ու պարի պահպանումը, սերնդեսերունդ փոխանցումը, որպեսզի եկող սերունդը դառնա հայկական մշակույթի կրողն ու իրենցից հետո եկող սերնդին փոխանցողը:
«Վստահ եմ, որ այնտեղ, որտեղ հնչել, հնչում ու դեռ հնչելու է հայկական ավանդական երգն ու պարը, այնտեղ հայը միշտ հաղթել, հաղթում ու հաղթելու է: Արցախցիների կյանքում մեծ դերակատարություն են ունեցել նաև հարսանեկան ու ծիսական պարերը. դրանով է արցախցին պահպանել իր ազգային դիմանկարը, և այդ պարերը պետք է փոխանցվեն սերնդեսերունդ: Այո´, միշտ և ամենուր հաղթանակած արցախցին պետք է երգի ու պարի»,- վստահությամբ ասել է Գ. Գինոսյանը և խոստացել, որ ինքը իր փորձն արցախցիներին փոխանցելու նպատակով, ամիսը գոնե մեկ անգամ կաշխատի լինել Արցախում:Գ. Գինոսյանը կարևորում է նաև երիտասարդների հետ նմանատիպ միջոցառումների հաճախակի կազմակերպելը, հայկական ավանդական երգ ու պարի սովորեցնելն ու դրանք մասսայական դարձնելը:
