Դեկտեմբերի 11-ին թիվ 6 ընտրատարածքում ԱՀ Ազգային ժողովի մեծամասնական ընտրակարգով տեղի ունեցող պատգամավորի լրացուցիչ ընտրություններում «Ազատ հայրենիք» կուսակցությունը կառաջադրի Արմեն Հրանտի Օհանյանի թեկնածությունը:
Թիվ 6 ընտրատարածքում «Ազատ հայրենիք» կուսակցությունը կառաջադրի սեփական թեկնածուին
ՍՏԵՓԱՆԱԿԵՐՏ, 18 հոկտեմբերի, ԱՐՑԱԽՊՐԵՍ: Այս մասին «Արցախպրես»-ի հետ զրույցում ասել է ԱԺ ամենամեծ` «Հայրենիք» խմբակցության ղեկավար Արթուր Թովմասյանը: «Ինչպես գիտեք, հանրապետության Նախագահի կողմից Հադրութի շրջանի վարչակազմի ղեկավարի պաշտոնում նշանակվել է մեր խմբակցության անդամ Իվան Խորենի Ավանեսյանը: Այդ պաշտոնին նշանակվելուց առաջ պարոն Ավանեսյանը, սեփական դիմումի համաձայն, դադարեցրել էր իր պատգամավորական գործունեությունը: Ուստի, հաշվի առնելով, որ 2005, 2010 և 2015թթ.-ին Հադրութի շրջանում մեր կուսակցության առաջադրած թեկնածուները հավանության են արժանացել տեղի բնակչության կողմից, ինչպես նաև վերջին խորհրդարանական ընտրություններում նաև համամասնական ընտրակարգով «Ազատ հայրենիք» կուսակցությունն անվիճելի առաջատարն էր՝ տրամաբանական էր, որ պետք է առաջադրեինք մեր կուսակցական թեկնածուին»,- ասել է Ա. Թովմասյանը:
Մեր զրուցակցի խոսքով՝ օրեր առաջ կուսակցությունը որոշում է կայացրել դեկտեմբերի 11-ին թիվ 6 ընտրատարածքում ԱՀ Ազգային ժողովի մեծամասնական ընտրակարգով տեղի ունեցող պատգամավորի լրացուցիչ ընտրություններում առաջադրել և պաշտպանել Արմեն Հրանտի Օհանյանի թեկնածությունը:
ԱԺ «Հայրենիք» խմբակցության ղեկավարը նշեց նաև, որ դեռևս 2005թ.-ին Արմեն Օհանյանը, ունենալով «Ազատ հայրենիք» կուսակցության աջակցությունը, մեծամասնական ընտրակարգով Հադրութի շրջանից պատգամավոր էր ընտրվել, իսկ 2010թ.-ին ԱՀԿ համամասնական ցուցակով նա կրկին խորհրդարանում աշխատելու հնարավորություն է ստացել: «2015թ.-ից պարոն Օհանյանը աշխատում էր Հադրութի շրջանի վարչակազմի ղեկավարի տեղակալի պաշտոնում և իր գործունեությամբ շարունակում էր ծառայել շրջանի բնակչությանը: Ուրախ կլինենք մեր փորձառու գործընկերոջը կրկին օրենսդրական դաշտում տեսնելու»,- խոսքը եզրափակել է Ա. Թովմասյանը:
