«Ազատ հայրենիք» կուսակցության երիտասարդական թևի նախաձեռնությամբ՝ ավելի քան 250 երիտասարդներ, ԱՀ պետական նախարար, ԱՀԿ նախագահ Արայիկ Հարությունյանի գլխավորությամբ, այցելություն են կատարել Ամարասի վանանական համալիր:
«Ազատ հայրենիք» կուսակցության նախաձեռնությամբ` ավելի քան 250 երիտասարդներ այցելել են Ամարասի վանանական համալիր
ՍՏԵՓԱՆԱԿԵՐՏ, 24 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ Ամարասի վանքում երիտասարդները մասնակցել են հայ մեծ բարերար Լևոն Հայրապետյանի հիշատակին նվիրված պատարագին և կատարել մոմավառություն:
Այնուհետև երիտասարդներն այցելել են Հադրութի շրջանի Տող գյուղի մերձակայքում գտնվող «Ջրաշխարհ» հանգստի գոտի, որտեղ հանդիպել են շրջանի վարչակազմի նորանշանակ ղեկավար Իվան Ավանեսյանի հետ և քննարկել տարաբնույթ հարցեր:
ԱՀԿ նախագահ Արայիկ Հարությունյանը երիտասարդների հետ հանդիպմանն ասել է, որ նման միջոցառումների նպատակն է համախմբել բոլորին մեկ ընդհանուր գաղափարի՝ հայրենիքի շուրջ: 
«Դուք երջանիկ սերունդ եք, քանի որ մեծանում եք անկախ և ազատ հայրենիքում: Բայց միևնույն ժամանակ ձեր ուսերին մեծ պատասխանատվություն եք կրում հայրենիքի առաջ, քանի որ դեռևս բազմաթիվ ծրագրեր կան իրագործելու: Այս համատեքստում կարևոր է ճանաչել հայրենիքը՝ այցելելով, տեսնելով և սիրելով նրա յուրաքանչյուր անկյունը: Մենք պարտավոր ենք ունենալ արժանի սերունդ, ով կփոխարինի մեզ և կլինի միասնական»,- ասել է Ա. Հարությունյանը:
«Ազատ հայրենիք» կուսակցության երիտասարդական թևի պատասխանատուներից Գոռ Բալասանյանը նշել է, որ միջոցառումը կազմակերպվել է ԱՀԿ երիտթևի հայրենաճանաչողական ծրագրի շրջանակում, ինչպես նաև հարգանքի տուրք մատուցելու համար Լևոն Հայրապետյանի հիշատակին:
«Միջոցառմանը ընդգրկել ենք հանրապետության բոլոր շրջաններում ապրող մեր կուսակցական և համակիր ընկերներին: Այն շարունակական է լինելու և նպատակ ունի, որպեսզի նոր սերունդը տեսնի և ճանաչի մեր նախնիների թողած պատմամշակութային մեծ ժառանգությունը»,- ասել է Գ. Բալասանյանը և հավելել, որ նմանօրինակ միջոցառումները նպաստում են նաև երիտասարդների՝ իրար լավ ճանաչելուն և նոր ընկերական կապերի ստեղծմանը:
Իսկ երիտթևի պատասխանատուներից Մարիաննա Պետրոսյանը նշել է, որ միջոցառումը հնարավորություն է տալիս միասնական կերպով մեկ նպատակի ծառայելու և համատեղ նոր ծրագրեր կազմելու:
«Հայրենաճանաչողության ծրագիրը շատ կարևոր հնարավորություն է մեր հայրենիքը ճանաչելու համար, քանի որ տարբեր պատճառներով մենք ուղղակի չենք այցելում՝ թեկուզ ամենամոտ գտնվող որևէ պատմամշակութային արժեք ներկայացնող հուշարձանը տեսնելու: Ուրախ եմ, որ «Ազատ հայրենիք» կուսակցությունը պարբերաբար նման հնարավորություններ է ստեղծում»,- ասել է Մ. Պետրոսյանը:
Այցի ընթացքում կուսակցության երիտասարդները հանդես են եկել նաև գեղարվեստական միջոցառմամբ, որտեղ ներկա էին նաև ԱՀ կուսակցությունից ընտրված Ազգային ժողովի պատգամավորներ:
