Հոկտեմբերի 24-ին, ինչպես արդեն տեղեկացրել ենք ավելի վաղ, բացվել է ԱՀ պաշտպանության բանակի՝ տեխնիկական ժամանակակից սարքավորումներով վերազինված տեղեկատվական կենտրոնը:
ՊԲ տեղեկատվական կենտրոնն ապահովված է ճգնաժամային իրավիճակներում անհրաժեշտ բոլոր սարքավորումներով. Տիգրան Աբրահամյան
ՍՏԵՓԱՆԱԿԵՐՏ, 27 հոկտեմբերի, ԱՐՑԱԽՊՐԵՍ: Ի՞նչ խնդիրներ է լուծելու ՊԲ տեղեկատվական կենտրոնը, ի՞նչ աշխատանքներ է այն իրականացնելու խաղաղ և արտակարգ իրավիճակներում. այս և այլ հարցերի մասին «Արցախպրես»-ը զրուցել է Արցախի Հանրապետության Նախագահի անվտանգության հարցերով խորհրդական Տիգրան Աբրահամյանի հետ:
- Պարո՛ն Աբրահամյան, ի՞նչ խնդիրներ է լուծելու կենտրոնը: Ինչպիսի՞ առավելություններ է ունենալու, որոնք բացակայում էին նախկինում:
- Արցախի պաշտպանության բանակի տեղեկատվական կենտրոնը գործելու է ՊԲ մամուլի ծառայության ներքո, որին ճգնաժամային իրավիճակներում աջակցելու են բոլոր պետական մարմինների մամուլի ծառայությունները: Նախկինում առհասարակ նման կենտրոն չենք ունեցել, և լրագրողների աշխատանքը ստիպված ենք եղել կազմակերպել տարբեր հասարակական օբյեկտներում՝ ոչ համակարգված ձևով:
Ավելին՝ հնարավորություն չի եղել լրագրողների համար ապահովել պայմաններ՝ մասնագիտական պարտքն իրականացնելու, իրավիճակից բխող պատշաճ տեղեկատվական ապահովում իրականացնելու համար:
Կարող ենք արձանագրել, որ անվտանգության ապահովման և դա մի քանի աստիճանով բարձրացնելու ուղղված մեծ քայլ է կատարվել:
- Կենտրոնի աշխատակիցները որտե՞ղ են անցնելու մասնագիտացված վերապատրաստման դասընթացներ:
- Կենտրոնը խաղաղ և պատերազմական վիճակում սպասարկվելու է ՊԲ լրատվական ծառայության կողմից, իսկ մասնագիտացված վերապատրաստում կարող են անցնել և՛ Արցախում, և՛ Հայաստանում:
- Մեդիակենտրոնը կազմակերպելո՞ւ է ուսումնական, մասնագիտական դասընթացներ Արցախում ռազմական լրագրողներ պատրաստելու գործում:
- Փորձելու ենք օգտագործել տեղեկատվական կենտրոնի բոլոր հնարավորությունները, այդ թվում՝ մասնագիտական դասընթացներ իրականացնելու համար:
- Ժնևի կոնվենցիան սահմանում է մարտական գործողությունների ժամանակ լրագրողների տեղաշարժը առաջնագծում: Գործնականում լրագրողները նման իրավիճակում հայտնվեցին 2016 թվականի ապրիլին: Ներկայումս մեդիակենտրոնը սահմանելո՞ւ է կանոնագիր, որով պետք է առաջնորդվեն Արցախում գործող լրագրողները:
- Պատերազմական ժամանակ լրագրողների աշխատանքը կարգավորվում է պաշտպանության բանակի հրամանատարի հրամանով, որն առաջիկայում վերանայվելու է: ՊԲ-ն փորձում է առավելագույնս անվտանգ պայմաններ ստեղծել առաջնագծում աշխատանքներ իրականացնող լրագրողների համար, ինչպես նաև՝ հստակ կանոնակարգել խաղի կանոնները:
- «Պան Արմենիան Մեդիա Գրուպ» ընկերությունը պատրաստակամություն է հայտնել կադրերի վերապատրաստման գործում: Ի՞նչ ձևաչափով է լինելու ընկերության աջակցությունը տեղեկատվական կենտրոնին:
- Պաշտպանության բանակի մամուլի ծառայության հայտի հիման վրա ընկերությունը ստանձնելու է տարբեր մասնագիտությունների տեր մարդկանց ուսուցման, վերապատրաստման աշխատանքը՝ օպերատորներ, տեխնիկական սպասարկման անձնակազմ, լրագրողներ:
- Պարո՛ն Աբրահամյան, իսկ տեխնիկական ինչպիսի՞ հնարավորություններով է ապահովված կենտրոնը:
- Տեղեկատվական կենտրոնը կարելի է ասել ապահովված է այն բոլոր անհրաժեշտ սարքավորումներով, որոնք ճգնաժամային իրավիճակում կարող են ապահովել տեղեկատվական ապահովման բոլոր անհրաժեշտ գործառույթները: Ներկայումս քննարկվում է կենտրոնի տարածքը ընդլայնելու և կենտրոնի ֆունկցիոնալ կարողությունների ավելացման հարցը, ինչին կանդրադառնանք ավելի ուշ:
