Այսօր՝ դեկտեմբերի 22-ին, Արցախի Հանրապետության Նախագահի նստավայրում տեղի է ունեցել պարգևատրման հանդիսավոր արարողություն՝ նվիրված էներգետիկի օրվան:
ԱՀ Նախագահը պարգևատրել է էներգետիկ ոլորտի ներկայացուցիչներին
ՍՏԵՓԱՆԱԿԵՐՏ, 22 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ԱՀ Նախագահ Բակո Սահակյանը, շնորհավորելով ներկաներին մասնագիտական տոնի առթիվ, ասել է, որ էներգետիկան մեր տնտեսության հիմնարար ուղղություններից է, որն ապահովում է երկրի դինամիկ զարգացումը:
«Հաշվի առնելով ոլորտի կարևորությունը՝ պետության ռազմավարությունն ուղղված է էներգետիկ հնարավորությունների ընդլայնմանը: Վերջին տարիներին շոշափելի աճել է էլեկտրաէներգիայի արտադրության ծավալը: Մինչև 2020 թվականը Արցախում նախատեսվում է կառուցել ևս 10 նոր հիդրոէլեկտրակայան, ինչի արդյունքում Արցախը կդառնա էլեկտրաէներգիա արտահանող երկիր»,- նշել է Բ. Սահակյանը և ավելացրել, որ էներգետիկայի ոլորտը նաեւ մեր տնտեսության ամենաազատականացված բնագավառներից է, որտեղ ակտիվորեն ներգրավված են պետական ու մասնավոր հատվածները, առկա են շոշափելի ներդրումային հոսքեր Մայր Հայաստանից եւ սփյուռքից:
Այնուհետև Նախագահ Սահակյանը ընկերության մի խումբ աշխատակիցների բարձր պարգևներ ու արժեքավոր նվերներ է հանձնել՝ ԱՀ էներգետիկ զարգացման գործում ունեցած ավանդի, երկարամյա բարեխիղճ աշխատանքի և մասնագիտական տոնի կապակցությամբ:
«Արցախէներգո» ընկերության գլխավոր տնօրեն Անդրանիկ Խաչատրյանն իր խոսքում ասել է, որ ընկերության հիմնական գործառույթն է էլեկտրաէներգիայի մատակարարումը և հանրապետության բարձրավոլտ բաշխիչ ցանցի շահագործումն ու ապահովումը:
Ընկերությունն ունի շուրջ 940 աշխատատեղ՝ 1 միլիարդ 921 միլիոն դրամ տարեկան աշխատավարձի ֆոնդով, սպասարկում է 3885 կմ օդային գիծ, 103 կմ մալուխային գիծ և 51177 բաժանորդ: Այսօր Արցախում գործում է 17 փոքր հիդրոէլեկտրակայան՝ 110 մեգավատտ դրվածքային հզորությամբ:
«10 տարվա ընթացքում էլեկտրաէներգիայի արտադրությունն աճել է ավելի քան 3 անգամ: 2017 թ. 11 ամսվա արդյունքներով՝ երկրում էլեկտրաէներգիայի ընդհանուր սպառումը կազմել է 313 միլիոն կիլովատտ-ժամ. աճը, նախորդ տարվա համեմատ, կազմել է 18.5 տոկոս: Հանրապետությունում արտադրվել է 297 միլիոն կիլովատտ-ժամ էլեկտրաէներգիա, որը, նախորդ տարվա նույն ժամանակահատվածի համեմատ, աճել է 11 տոկոսով»,- նշել է Ա. Խաչատրյանը՝ հավելելով, որ 2017 թ. օգոստոսի 29-ին ընկերությունը մասնավորեցվել է, և ներկայումս միակ բաժնետերն է «Միավորված էներգետիկ ընկերություն» ՓԲԸ-ն:
Նախագահի կողմից բարձր պարգևի արժանացած «Ջուր-էներգիա» ՍՊԸ հիմնադիր Հայկ Սուվարյանն էլ նշել է, որ մեծ պատիվ է Արցախի էներգետիկայի ոլորտում ունենալ փոքր մասնակցություն: «Միևնույն ժամանակ կարևորում եմ ԱՀ կառավարության հետ մեր համատեղ աշխատանքը՝ շարունակական փոխգործակցության ծրագրերի և ներդրումային միջավայր ստեղծելու համար»,- ասել է Հ. Սուվարյանը:
Միջոցառմանը ներկա էին ԱՀ ԱԺ նախագահ Աշոտ Ղուլյանը, Արցախի թեմի առաջնորդ Պարգև արքեպիսկոպոս Մարտիրոսյանը, պաշտոնատար այլ անձինք, ընկերության աշխատակիցներ և այլք: