Սիրիայի քրդերը հայտնել են, որ իրենք Աֆրինում Թուրքական ԶՈւ կողմից սկսված «Ձիթենու ճյուղ» ռազմական գործողության շարունակվելու դեպքում չեն մասնակցի Սոչիում սիրիական խնդրի կարգավորման վերաբերյալ հունվարի 29-ից 30-ը սպասվելիք բանակցություններին:
Սիրիայի քրդերը Աֆրինում Թուրքիայի ռազմական գործողությունների շարունակվելու դեպքում Սոչիի բանակցություններին չեն մասնակցելու
ՍՏԵՓԱՆԱԿԵՐՏ, 26 հունվարի, ԱՐՑԱԽՊՐԵՍ-ԱՐՄԵՆՊՐԵՍ: Այս մասին, հայտնում են թուրքական ԶԼՄ-ները: Թուրքիայի ԱԳՆ-ն իր հերթին Ռուսաստանի և Իրանի կողմերին հայտնել է, որ չի ցանկանում Սիրիայի քրդերին տեսնել Սոչիի բանակցություններում, և կողմերը բավարարել են Թուրքիայի պահանջը: Թուրքիայի նախագահ Ռեջեփ Թայիփ Էրդողանը ևս մեկ անգամ հայտարարել է, որ թուրքական զինված ուժերը սիրիական Աֆրինից հետո կարող են շարժվել Մանբիջ և այնտեղ նույնպես պայքարել քրդական զորամիավորումների դեմ: Էրդողանը նշել է նաև, որ թուրքական ԶՈՒ-ն «Ձիթենու ճյուղ» անունը կրող ռազմական գործողության շրջանակներում կարող է հասնել մինչև իրաքյան սահման: «Մենք այս գործողությունը շարունակելու ենք այնքան, մինչև հասնենք մեր նպատակին: Աֆրինից հետո ահաբեկիչներից կմաքրենք Մանբիջը: Եթե անհրաժեշտ լինի կհասնենք մինչև Իրաքի սահման և այդ տարածքներում գեթ մեկ ահաբեկիչ չենք թողնի»,-հայտարարել է Էրդողանը: Սիրիայի քրդերն իրենց հերթին կոչ են արել Սիրիայի իշխանություններին Աֆրինը պաշտպանել թուրքերից: PYD-ն կոչ է արել սիրիական իշխանություններին ապահովել Աֆրինի անվտանգությունը և Սիրիայի սահմանները պաշտպանել թուրքական նվաճողական քայլերից: Թուրքիայի զինված ուժերը հունվարի 20-ից Սիրիայի Աֆրին շրջանում քրդերի դեմ ռազմական գործողություն են սկսել, որը ստացել է «Ձիթենու ճյուղ» անվանումը: Այդ օրը թուրքական 72 ռազմական ինքնաթիռ ռմբակոծել են քրդերի դիրքերը, ինչից հետո թուրք զինվորներն անցել են սիրիական սահմանը: Գործողություններին մասնակցում են զգալի թվով զինվորներ ու զինտեխնիկա: Թուրքական զինուժն Աֆրին նահանգ է մտել 3 ուղղությամբ: Հունվարի 25-ին Սիրիայի արտաքին գործերի նախարարի տեղակալ Ֆայսալ Մեքդադը նշել է, որ թուրքական ռեժիմի կողմից իրականացվող հարձակումներին պատասխանելու համար անհրաժեշտ տեխնիկան բերված է պատրաստի վիճակի:
