ՀՀ Նախագահի նստավայրում Մարտական ծառայության մեդալի արժանացած զինծառայողներ Կարեն Անտոնյանն ու Կարեն Հակոբջանյանը պատրաստ են բարձր մարտական ոգով շարունակելու ծառայությունը հայրենիքին:
Մարտական ծառայության մեդալի արժանացած զինծառայողները վստահեցնում են` հայրենիքը հուսալի ձեռքերում է
ՍՏԵՓԱՆԱԿԵՐՏ, 28 հունվարի, ԱՐՑԱԽՊՐԵՍ-ԱՐՄԵՆՊՐԵՍ: Պարգևատրման արարողությունից հետո լրագրողների հետ զրույցում ՀՀ ԶՈՒ ինժեներական կահավորվածության գծով մասնագետ Կարեն Անտոնյանը վստահեցրեց` անում են ամեն ինչ, որ դիրքապահ զինվորներն անխոչընդոտ և անփորձանք կատարեն իրենց պարտականություններն առաջնագծում: «Մեզ մոտ օր օրի տեխնիկապես ամրապնդվում է առաջնագիծը, որպեսզի մեր զինվորները մարտական դիրքերում անվտանգ ու անփորձանք անցկացնեն իրենց ծառայությունը: Տեխնիկական սարքերը մեծ հնարավորություն են տալիս, և մենք դրան ամեն օր ականատես ենք լինում: Վստահեցնում եմ ձեզ, ցանկացած ներթափանցման փորձ տեղում կասեցվում է ու հետ է շպրտվում ելման դիրքեր»,-ասաց Կարեն Անտոնյանը: Ֆիզպատրաստության գծով պատասխանատու Կարեն Հակոբջանյանն էլ նշեց, որ ամենօրյա աշխատանք է տանում զինվորների մարտական պատրաստության բարձրացման ուղղությամբ: Նրա խոսքով`տղաները բանակ են զորակոչվում ֆիզիկապես լավ պայմաններում, իսկ ովքեր էլ զիջում են մյուսներին քրտնաջան պարապմունքների շնորհիվ հասնում են ցանկալի արդյունքի: «Աշխատում ենք, որ մեր զինվորները ֆիզիկապես ուժեղ լինեն, հաղթահարեն իրենց առջև դրված բոլոր խնդիրները, որպեսզի հակառակորդը չկարողանա մխրճվել մեր առաջնագիծ»,-ասաց Կարեն Հակոբջանյանը: Զինծառայողը հորդորեց բոլորին հանգիստ գլուխները բարձին դնել, որովհետև իրենց զավակները ամուր ձեռքերում են, ու հայրենիքի սահմանները պահում են զգոն ու առույգ զինվորները: ՀՀ Նախագահ Սերժ Սարգսյանը Բանակի օրվա առթիվ, hայրենիքի սահմանները պաշտպանելիս ցուցաբերած նվիրումի և խիզախության, ինչպես նաև մատուցած նշանակալի ծառայությունների համար մի խումբ զինծառայողների և ազատամարտիկների պարգևատրել է Հայաստանի Հանրապետության բարձր պարգևներով, շքանշաններով ու մեդալներով, շնորհել նաև բարձրագույն զինվորական կոչումներ:
