Արցախի պետական համալսարանում այսօր՝ մարտի 16-ին, մեկնարկել է Արցախյան շարժման 30-րդ տարեդարձին նվիրված միջազգային գիտաժողովը:
ԱրՊՀ-ում մեկնարկել է Արցախյան շարժման 30-րդ տարեդարձին նվիրված միջազգային գիտաժողովը
ՍՏԵՓԱՆԱԿԵՐՏ, մարտի 16, ԱՐՑԱԽՊՐԵՍ։ Գիտաժողովի մասնակիցները նախ ծաղիկներ են խոնարհել Արցախյան ազատամարտում ԱրՊՀ-ի զոհված ուսանողների հիշատակը հավերժացնող հուշաքարին, այնուհետև մասնակցել գիտաժողովի լիագումար նիստի բացմանը:
Ընդհանուր առմամբ, գիտաժողովին մասնակցում է 32 բուհերի, գերատեսչությունների, գիտական, կրթական կազմակերպությունների 122 մասնակից:
«Արցախպրես»-ի թղթակցի հաղորդմամբ՝ գիտաժողովի բացմանը ողջույնի խոսքով հանդես է եկել ԱՀ Ազգային ժողովի և ԱրՊՀ խորհրդի նախագահ Աշոտ Ղուլյանը:
Նա իր խոսքում ասել է, որ ինչպես 30 տարի առաջ, այնպես էլ այս տարվա փետրվարի 13-ին, համաժողովրդական հանրահավաքը մեկնարկել է հենց ԱրՊՀ-ից՝ խորհրդանշելով հասարակության, ուսանողական-երիտասարդական-դասախոսական ակտիվ դերակատարությունը հանուն անկախության:
Ըստ Ա. Ղուլյանի՝ 2018 թվականը, ինչպես Արցախում, այնպես էլ մայր Հայաստանում, Սփյուռքի հայկական համայնքներում արժևորվում է հայության համար շատ կարևոր և բախտորոշ 2 իրադարձություններով՝ Արցախյան շարժման 30-ամյա տարեդարձով և Հայաստանի Առաջին Հանրապետության 100-ամյակով:
«Արցախյան շարժման և դրան հաջորդած տարիների արժեքն ու կարևորությունը, դրա շուրջ ակադեմիական նյութերը թույլ են տալիս անընդհատ և ոլորտային տարբեր ուղղություններով հետևողականորեն ուսումնասիրելու պատմական այդ նշանակալի ժամանակաշրջանը: Այսօրվա գիտաժողովը մեծ արժեք ունի, քանի որ զեկուցումներում ներկայացված կարծիքներն ու մտքերը, թեզերն ու պնդումները հնարավորություն են ընձեռելու ավելի խորը ու համապարփակ ընկալելու այդ բեկումնային իրադարձության նշանակությունը»,-ըստ էության ասել է Ա. Ղուլյանը:
ԱՀ կրթության, գիտության և սպորտի նախարար Նարինե Աղաբալյանը, իր հերթին կարևորելով գիտաժողովի անցկացումը, ասել է, որ տարին հոբելյանական է ոչ միայն արցախցիների, այլև համայն հայության համար, քանզի իր բնույթով ու նշանակությամբ Արցախյան շարժումը համազգային էր:
Ն. Աղաբալյանի հավաստմամբ՝ այսօր՝ 30 տարվա հեռավորությունից, ավելի հստակ է ուրվագծվում Արցախյան շարժման ազդեցությունն աշխարհաքաղաքական զարգացումների վրա:
Նա ընդգծել է, որ եթե անգամ նախորդ դարի 80-ականներին միջազգային հանրությունն անծանոթ է եղել Արցախի ժողովրդի ընդվզման պատմական հիմքերին, ապա միայն վերջին 30 տարվա պատմության իմացությունը բավարար է հակամարտող կողմերին՝ օբյեկտիվ գնահատելու և ճիշտ հետևություններ անելու համար:
Ն. Աղաբալյանն իր խոսքում մասնավորապես նշել է նաև, որ Արցախով հետաքրքրված յուրաքանչյուր ոք անհանդուրժողականություն պիտի ցուցաբերի Ադրբեջանի հանդեպ. այդ երկիրը, սկսած մանկապարտեզից, հայատյացության դասեր է տալիս իր ժողովրդին. սա է Ադրբեջանի իրական դեմքը:
Արցախի պետական համալսարանի ռեկտոր Մանուշ Մինասյանը իր հերթին ևս կարևորել է ԱրՊՀ-ում նման գիտաժողովի կազմակերպումը:
Իր խոսքում նա նշել է, որ փետրվարը հայ ժողովրդի նորագույն պատմության մեջ զարթոնքի ամիս է, հայոց կամքի և տոկունության խորհրդանիշ:
Նրա խոսքով՝ 1988 թվականին էր, որ հայ ժողովուրդն ազգովի ոտքի ելավ՝ փշրելու օտարի լուծը, նվաճելու սեփական հողի վրա ազատ և ինքնիշխան ապրելու, սեփական ապագան կերտելու իր իրավունքը:
Ռեկտորը նշել է, որ 1988 թվականի ոգին ու պատգամը 30 տարի անց էլ շարունակվում է բոլորի համար ուղենիշ հանդիսանալ:
«Մենք կերտելու ու կառուցելու ենք անկախ, ժողովրդավարական ու սոցիալական երկիր՝ էլ ավելի ամրապնդելով Հայաստան-Արցախ–Սփյուռք եռամիասնությունը: Անկախ պետականությունը մեր ամենամեծ արժեքն է, և բոլորիս պարտքն է՝ անել առավելագույնը դրա շարունակական զարգացման ու հզորացման համար: Վերջին 3 տասնամյակում Արցախն անցել է պետականաշինության լուրջ ճանապարհ. վերականգնել պատերազմի հետևանքով գրեթե հիմնովին ավերված տնտեսությունը և թևակոխել կայուն զարգացման փուլ»,- մասնավորապես ասել է Մ. Մինասյանը՝ ընդգծելով, որ գիտաժողովի շրջանակում ներկայացված զեկուցումները հետագայում կհրատարակվեն և կարևոր կռվաններ կդառնան Արցախի Հանրապետության ճանաչման գործում:
Լիագումար նիստից հետո գիտաժողովի աշխատանքները, ըստ առանձին մասնագիտությունների, շարունակելու են 6 մասնախմբերում:
Տեղեկացնենք, որ գիտաժողովի փակման արարողությունը տեղի է ունենալու ԱրՊՀ-ում, վաղը՝ մարտի 17-ին:
