Հուշարձանների և տեսարժան վայրերի միջազգային օրվան՝ ապրիլի 18-ին ընդառաջ, կազմակերպվելու է միջոցառումների համալիր ծրագիր՝ այցելություններ Արցախի տեսարժան վայրեր, թեմատիկ դասախոսություններ, ինտելեկտուալ խաղեր:
Արցախում նախատեսվում են հուշարձանների միջազգային օրվան նվիրված համալիր ծրագրեր
ՍՏԵՓԱՆԱԿԵՐՏ, մարտի 27, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասել է ԱՀ մշակույթի, երիտասարդության հարցերի և զբոսաշրջության նախարարության զբոսաշրջության վարչության պետ Արտակ Գրիգորյանն՝ ավելացնելով, որ արդեն մշակվել է օրվան նվիրված ծրագիրը, որը ներառելու է թե՛ մասնագիտական փակ և թե՛ հանրային միջոցառումներ:
«Ծրագրի շրջանակներում դպրոցներում համապատասխան թեմատիկայով կազմակերպվելու է շարադրությունների մրցույթ: Ունենալու ենք նաև շաբաթօրյակներ, այցելություններ վտանգված հուշարձանների տարածքներ, որոնց նպատակն է այդ հուշարձանների հանդեպ հետաքրքվածության և ճանաչելիության բարձրացումը: Այս տարվա խորհուրդը կոչվում է «Ժառանգություն սերունդների համար»: Այն հուշարձանները, որոնք այսօր ունենք, ոչ թե մեզ հասած նվեր է, որ պետք է օգտագործենք, այլ՝ մշակութային ժառանգություն, որ պետք է փոխանցենք հաջորդ սերունդներին»,- նշել է Ա. Գրիգորյանը և կարևորել, որ, հուշարձանների և տեսարժան վայրերի միջազգային օրվան նվիրված, կազմակերպվելու է նաև միջգերատեսչական հնագիտական հանձնաժողովի նիստ, որին հրավիրվելու են համապատասխան մասնագետներ և լրատվամիջոցների ներկայացուցիչներ՝ քննարկելու 2017 թվականի ընթացքում Արցախում իրականացված հնագիտական պեղումների արդյունքները:
Ա. Գրիգորյանի խոսքով՝ Հադրութի շրջանի Տյաք գյուղում, որի որոշ հատվածներ ճանաչվել են պատմամշակութային արգելոց, կազմակերպվելու է ինտելեկտուալ խաղ: Պատմամշակութային հուշարձանների այդ օրվա այցելությունների ցանկում ավանդաբար ընդգրկվելու է նաև Տիգրանակերտը: Ապրիլի 18-ը հռչակվելու է «Բաց դռների օր» Արցախի պատմամշակութային հուշարձաններ այցելել ցանկացողների համար:
«Փորձելու ենք ծրագիրը մասսայականացնել՝ նպատակ ունենալով ներառել Արցախի բոլոր համայնքների հուշարձանները: Մոտակա օրերին հրապարակվելու է միջոցառումների հստակ ժամանակացույցը»,- ավելացրել է Ա. Գրիգորյանը:
