ԱՀ էկոնոմիկայի և արտադրական ենթակառուցվածքների նախարար Լևոն Գրիգորյանն այսօր՝ մարտի 29-ին, ընդունել է աշխատանքային այցով Արցախ ժամանած Հայաստանի խաղողագործության և գինեգործության հիմնադրամի տնօրեն Զարուհի Մուրադյանին, Ռուսաստանի Սոմելյեների և փորձագետների միության նախագահ Արթուր Սարգսյանին և Հայաստանի փոքր ու միջին ձեռնարկատիրության զարգացման ազգային կենտրոնի գործադիր տնօրեն Լևոն Մնացականյանին:
Լևոն Գրիգորյանը ՀՀ գործընկերների հետ քննարկել է Արցախում գինեգործության զարգացման ծրագրերը
ՍՏԵՓԱՆԱԿԵՐՏ, մարտի 29, ԱՐՑԱԽՊՐԵՍ: Ողջունելով հյուրերին` նախարար Գրիգորյանը շնորհակալություն է հայտնել Արցախ այցելելու և տեղում առարկայական քննարկումներ ծավալալելու համար: Նրա խոսքով՝ վերջին շրջանում Արցախում կրկին զարգանում է գինեգործության ոլորտը, և մեկ տասնյակից ավելի գինեգործարաններից բացի, ավելացել են նաև տնային պայմաններում գինի արտադրողները: «Հանրապետության իշխանությունների կողմից մեծ ուշադրություն է դարձվում գինեգործության զարգացմանը: Այդ նպատակով տարբեր գործիքակազմեր են կիրառվում՝ սկսած այգիների մշակությունից, մինչև ապրանքի վերջնական արտադրություն և վաճառք: Արդեն քայլեր ենք ձեռնարկում ՀՀ-ի հետ գործնական միջոցառումներ և ծրագրեր իրականացնելու համար»,- ասել է նախարարը և հույս հայտնել, որ նման ձևաչափով քննարկումները իրենց դրական ազդեցությունը կունենան ոլորտի զարգացման վրա:
Իր հերթին, կարևորելով այցի նպատակները, Հայաստանի խաղողագործության և գինեգործության հիմնադրամի տնօրեն Զ. Մուրադյանը ներկայացրել է իր ղեկավարած կառույցի գործառույթները՝ ընդգծելով կրթական ծրագրերի դերը գինեգործության զարգացման գործում: «2014թ. Հայաստանում գործում է Ի-Վի-Էն գինու ակադեմիան, որը հնարավորություն է տալիս ուսանողներին փորձուսուցում անցնել արտերկրում՝ հատկապես Իտալիայում, Ֆրանսիայում և Գերմանիայում: Մենք պատրաստ ենք աջակցել նաև Արցախի մասնագետներին և ծրագրի շրջանակներում նրանց ուղարկել արտասահման վերապատրաստվելու: Ժամանակի զարգացումներից հետ չմնալու համար որակյալ մասնագետներ ունենալը իրական երաշխիք է»,- ասել է ՀԽԳ հիմնադրամի տնօրենը:
Իսկ Ռուսաստանի Սոմելյեների և փորձագետների միության նախագահ Ա. Սարգսյանը, խոսելով տարածաշրջանում հայկական գինու ճանաչելիությունից, նշել է, որ այն շատ ավելի ընդունված ու գնահատված է, քան հարևան պետություններինը: Սակայն, նրա կարծիքով, մարքետինգի խնդիր ունի և այս ուղղությամբ պետք է ակտիվացնել աշխատանքները:
Հանդիպման ընթացքում զրուցակիցները քննարկել են համագործակցության կապերի ընդլայնման, արցախյան գինու արտահանման և խոշոր շուկաներում ճանաչելիության հետ կապված հարցեր:
Նշենք, որ հանդիպմանը ներկա էր նաև Արցախի խաղողագործների և գինեգործների միության նախագահ, արցախյան «Կատարո» գինու արտադրող Գրիգորի Ավետիսյանը:
