Արցախի նկարիչների միավորման նախաձեռնությամբ Ստեփանակերտի պատկերասրահում կայացել է արցախցի նկարիչ Ալեքսանդր Աթայանի անհատական աշխատանքների ցուցահանդեսը՝ նվիրված իր ծննդյան 65-ամյակին:
Ստեփանակերտում կայացել է արցախցի նկարչի անհատական ցուցահանդեսը (լուսանկարներ)
ՍՏԵՓԱՆԱԿԵՐՏ, մայիսի 3, ԱՐՑԱԽՊՐԵՍ: «Արցախպրես»-ի թղթակցի հետ զրույցում Ալեքսանդր Աթայանն ասել է, որ իր ցուցահանդեսում ներկայացված է 36 աշխատանք:
Նրա խոսքով՝ ինքը նկարել սկսել է դեռևս մանկուց՝ երազելով դառնալ անվանի նկարիչ:
«Հիմնականում նկարում եմ կոմպոզիցիոն աշխատանքներ, դիմանկարներ և բնանկարներ: 1977 թվականին «Արցախն արթնանում է» թեմայով ներկայացրել եմ կոմպոզիցիոն աշխատանք. այն այժմ գտնվում է Երևանի ազգային պատկերասրահի ֆոնդում»,-ասել է նկարիչը և ավելացրել, որ առաջիկայում մտադրություն ունի նկարել Ստեփանակերտի փողոցներն ու շենքերը:
Հակոբ Գյուրջյանի անվան ինստիտուտի ռեկտոր Յուրի Հովհաննիսյանը, խոսելով իր գործընկերոջ կողմից ներկայացված աշխատանքների մասին, ասել է, որ հեղինակն իր բազմապիսի ներկապնակով ստեղծել է գունեղ նկարներ: Նրա ստեղծագործություն-ներում առկա է հայկական կոլորիտը,մարդկային զգացողություններն ու ապրումները:
Իսկ Արցախցի նկարիչ Լավրենտ Ղալայանն էլ Ա. Աթայանին բնութագրել է որպես Արցախի մոնումենտալ նկարիչ:
Նա ասել է, որ Ա. Աթայանը եղել է իր առաջին սաներից մեկը, ով տարբերվել է իր անհատականությամբ, ակտիվությամբ, ջանասիրությամբ և նկարչության հանդեպ տածած սիրով:
Լ. Ղալայանն ավելացրել է նաև, որ Ա. Աթայանը դասախոսելով Արցախի պետական համալսարանում՝ արվեստագետն իր ունեցած գիտելիքներն ու փորձը փոխանցում է մատաղ սերնդին՝ ներկայացնելով նկարչության իր ուրույն և անհատական աշխարհը:
Ցուցահանդեսին ներկա նկարիչները, ԱրՊՀ դասախոսները, արվեստասեր հասարակայնությունը և այլք շրջել են պատկերասրահով և դիտել Ա. Աթայանի աշխատանքները: