Հայաստանի Հանրապետական կուսակցությունն արտահերթ խորհրդարանական ընտրությունների հարց չի քննարկել:
Շարմազանովը ժամանակավրեպ է համարում արտահերթ խորհրդարանական ընտրությունների մասին խոսելը
ՍՏԵՓԱՆԱԿԵՐՏ, մայիսի 17, ԱՐՑԱԽՊՐԵՍ-ԱՐՄԵՆՊՐԵՍ: ՀՀԿ ԳՄ նիստից հետո լրագրողների հետ հանդիպմանն այս մասին ասաց ՀՀԿ խոսնակ, Ազգային ժողովի փոխնախագահ Էդուարդ Շարմազանովը: «Ավելին՝ արտահերթ ընտրությունների համար անհրաժեշտ են իրավական և քաղաքական պայմաններ: Որքան ես տեղյակ եմ, վարչապետ Նիկոլ Փաշինյանը պատրաստվում է Ազգային ժողովի դատին ներկայացնել գոնե իրենց տպավորությամբ հավակնոտ ծրագիր: Իսկ Սահմանադրությունը հստակ տալիս է այն ուղիները, երբ կարող է արձակվել Ազգային ժողովը: Եթե մենք կողմ ենք քվեարկում կառավարության ծրագրին, բնականաբար, այս փուլում Ազգային ժողովի արտահերթ ընտրությունների անցկացման հարց դեռևս դրված չէ: Իշխանության ներկայացուցիչներն ասել են, որ սա քննարկման հարց է: Կքննարկենք, կտեսնենք»,- նշեց նա:
Շարմազանովը նաև հավելեց, որ քաղաքական իրադարձությունները շատ արագ են զարգանում, և որևէ մեկը չի կարող ասել, թե ինչ կլինի երկու, երեք կամ չորս ամիս հետո: «Դրա համար ես կարծում եմ, որ ժամանակավրեպ է, որ մենք խոսենք մի բանի մասին, որը կարող է արդիական լինել մի քանի ամսից կամ ընդհանրապես չլինել»,- ասաց ՀՀ ԱԺ փոխնախագահը:
Նա ընդգծեց, որ իրենք չեն պատրաստվում արհեստականորեն խոչընդոտել կառավարության գործունեությունը: «Մենք արցախյան հիմնահարցի կարգավորման հարցում հետքայլ չենք անելու, Ցեղասպանության ճանաչման հարցում հետքայլ չենք անելու, մեր ազգային արժեքներն ամրապնդելու հարցում հետքայլ չենք անելու և պատրաստ ենք աշխատել նոր կառավարության հետ հանուն Հայաստանի Հանրապետության ժողովրդի: Պատրաստ ենք քննարկել ցանկացած օրենսդրական նախաձեռնության ընդունում, որը կբխի Հայաստանի քաղաքացիների շահերից»,- ասաց նա:
Նա ևս մեկ անգամ կրկնեց, որ արտահերթ ընտրությունների մասին խոսելը ժամանակավրեպ է, քանի որ այս պահին նման հարց նաև գործող իշխանությունների օրակարգում չկա:
