«Արցախպրես» հայկական լրատվական գործակալությունն այսօր՝ մայիսի 23-ին, նշում է իր հիմնադրման 4-ամյակը:
Վստահելի և օպերատիվ. «Արցախպրես»-ին շնորհավորում են քաղաքական գործիչները
ՍՏԵՓԱՆԱԿԵՐՏ, մայիսի 23, ԱՐՑԱԽՊՐԵՍ: Լրատվամիջոցի գործունեության մասին իրենց տեսակետներն են արտահայտել ԱՀ Ազգային ժողովի փոխնախագահ Վահրամ Բալայանը, Արցախի Հանրապետության նախագահի մամլո քարտուղար Դավիթ Բաբայանը, կրթության, գիտության և սպորտի նախարար Նարինե Աղաբալյանը և մշակույթի, երիտասարդության հարցերի ու զբոսաշրջության նախարար Սերգեյ Շահվերդյանը:
Վահրամ Բալայան. Անկախության ժամանակահատվածում մեր լրատվադաշտը նոր որակ ձեռք բերեց, սկսեց իրական դառնալ բազմակարծությունը, և այդ գործընթացում իր դերն 
ունեցավ «Արցախպրես» լրատվական գործակալությունը: Լրատվամիջոցը մշտապես կանգնած է նորությունների կիզակետում: «Արցախպրես»-ը հանրությանը ներկայացնում է այն ամենը, ինչ կատարվում է Արցախում և արտերկրում:
Ցանկալի է, որ գործակալությունը օրախնդիր հարցերին ավելի շատ անդրադառնա, որովհետև հանրությունը հետևում է այս լրատվամիջոցին և ստույգ իմանում ամեն ինչ:
Օպերատիվության տեսանկյունից կասեմ, որ գործակալությունը լուրերն ու փաստերը ներկայացնում է ժամանակին, առանց կողմնակալ մոտեցումների: Լավ կլինի նաև, որ կայքում ավելի շատ լինեն վերլուծական նյութեր:
Դավիթ Բաբայան. «Արցախպրես»-ը՝ որպես լրատվական գործակալություն, այս տարիների ընթացքում կայացել է: Այն, իրավամբ, ինչպես Արցախում, Հայաստանում, այնպես էլ 
արտերկրում, կարելի է համարել Արցախի մասին հաղորդվող հավաստի տեղեկությունների աղբյուր:
Կարծում եմ՝ այն նոր ոճ ու շունչ է հաղորդում Արցախի լրատվադաշտին: «Արցախպրես»-ը կարողանում է պահպանել օպերատիվությունը և անկողմնակալ լինելը: Հուսով ենք, որ 4-ամյա լրատվամիջոցը, նույն սկզբունքներով առաջնորդվելով, կկարողանա շարունակել իր առաքելությունը:
Լավ կլիներ, որ «Արցախպրես»-ն ունենար սեփական թղթակիցներ նաև Հայաստանում և արտերկրում:
Երբեմն նաև «Արցախպրես»-ի թղթակիցները կարողանան ուղիղ եթեր ապահովել տեղի ունեցող իրադարձությունների մասին:
Նարինե Աղաբալյան. Չնայած երիտասարդ տարիքին՝ «Արցախպրես»-ը վստահ քայլերով շարժվում է առաջ և արդեն իր ուրույն տեղն ունի արցախյան լրատվադաշտում: Կարծում եմ՝ 
տարիների ընթացքում կավելանան լրատվամիջոցի փորձն ու հռչակը: Իսկ լրատվականի համար ամենաառաջին որակը՝ օպերատիվությունը, արդեն հասցրել եք ամրապնդել՝ «Արցախպրես»-ը դարձնելով ոչ միայն Արցախի, այլ նաև Հայաստանի ու Սփյուռքի իրադարձությունները ներկայացնող միասնական հարթակ: Բարի ընթացք եմ մաղթում ողջ խմբագրակազմին և ցանկանում, որ Արցախպրեսի լրահոսը միշտ հագեցած լինի բարի լուրերով:
Սերգեյ Շահվերդյան. Կարծում եմ՝ գործունեության 4 տարիների ընթացքում «Արցախպրես»-ին հաջողվել է արժանանալ հանրության վստահությանը: Եվ սա, առաջին 
հերթին, արդյունք է մատուցվող արժանահավատ տեղեկության և օպերատիվության:
Կարևոր է նաև, որ «Արցախպրեսը»՝ որպես անկախ լրատվամիջոց, հանդիսանում է տեղեկատվության առաջնային աղբյուր ինչպես հայկական, այնպես էլ արտասահմանյան լրատվամիջոցների համար: Այն դեռ ճանապարհ ունի անցնելու մրցակիցների մեջ կայուն տեղ զբաղեցնելու, արտերկրում վստահելի տեղեկատվական աղբյուր դառնալու, բազմակարծություն ապահովող հարթակի վերածվելու համար: Հաշվի առնելով «հոբեյլարի տարիքը»՝ կարծում եմ՝ այդ ամենը դեռ առջևում է:
Շնորհավորում եմ «Արցախպրես»-ի անձնակազմին, շնորհակալություն հայտնում սերտ համագործակցության համար և հաջողություններ մաղթում՝ ապագայի համար ակնկալելով նաև վերլուծական լրատվություն:
