Սիրելի՛ ընկերներ, այս օրերին իմ և «Մարտիկ» հիմնադրամի շուրջ եղած հրապարակումները մեծ արձագանք ստացան, ինչը սպասելի էր։
Ծանր ժամանակներ ենք ապրում ու մեզ սպասվում են կանխատեսելի մարտահրավերներ. Արթուր Աղաբեկյանը՝ «Մարտիկ»-ի շուրջ բարձրացված աղմուկի մասին
ՍՏԵՓԱՆԱԿԵՐՏ, սեպտեմբերի 3, ԱՐՑԱԽՊՐԵՍ: Այս մասին ֆեյսբուքյան իր էջում գրել է «Մարտիկ» հիմնադրամի հոգաբարձուների խորհրդի նախագահ, Արցախի Հանրապետության նախկին փոխվարչապետ, «Արցախի հերոս», Արցախի նախագահի խորհրդական Արթուր Աղաբեկյանը:
Նա նշել է, որ այս ընթացքում ստացել է աջակցության բազում զանգեր, հրապարակումներում եղել են հիստերիկ եւ քենով լի մեկնաբանություններ։
Անդրադառնալով Արցախի Հանրապետության նախկին վարչապետ Արայիկ Հարությունյանի այս առնչությամբ կատարած հայտարարությանը՝ Ա. Աղաբեկյանը նշել է. «Իմ լավ ընկեր Արայիկ Հարությունյանը իր և մեր ընկերների անունից արեց իրեն բնորոշ հայտարարություն, ինչը ցավոք չարակամները գնահատեցին միայն իրենց «արշինով»։ Իմ ընկեր Արայիկ և շատ շատեր, շնորհակալ եմ ձեր անկեղծ պատրաստակամության համար, գտնում եմ, որ դեպոզիտային հաշվին գումար մուտք անելու կարիքը չկա։ Փոխարենը դիմում եմ բոլորիդ, մի փոքր վերլուծության դեպքում դուք կհասկանաք, որ ծանր ժամանակներ ենք ապրում ու մեզ սպասվում են կանխատեսելի մարտահրավերներ, որին կարող ենք դիմակայել, եթե դրան պատրաստ ենք։
Ինձ սատարելու ցանկություն ունեցող իմ ընկերներ, ձեր լավագույն աջակցությունն ինձ կլինի ձեր մասնակցությունը եւ նվիրաբերումը «Մարտիկ» հիմնադրամին (martik.am)»:
Գրառման տակ Ա. Աղաբեկյանը հետգրությամբ նշել է, որ այս օրերին լսել է, թե իբր որոշներին ստիպել են դառնալ «Մարտիկի» մասնակից: «Եթե կան այդպիսիք, ապա կարող են դիմել «Մարտիկի» գրասենյակ, որևէ ձևով այդ գումարը ետ ստանալու հարցը քննարկելու համար, կամ էլ կարող են դիմել քննչական ծառայությանը»,- գրել է Ա. Աղաբեկյանը։
