Այսօր՝ սեպտեմբերի 3-ին, Արցախի պետական համալսարանում անց է կացվել արիության դաս՝ նվիրված ԱՀ անկախության հռչակման 27-րդ տարեդարձին:
Արցախի պետական համալսարանում անց է կացվել արիության դաս
ՍՏԵՓԱՆԱԿԵՐՏ, սեպտեմբերի 3, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ԱՀ Ազգային ժողովի նախագահ Աշոտ Ղուլյանը, ԱՀ կրթության, գիտության և սպորտի նախարար Նարինե Աղաբալյանը, ԱրՊՀ ռեկտոր Մանուշ Մինասյանը և համալսարանականներ մինչ միջոցառման սկսվելը ծաղիկներ են խոնարհել Արցախյան ազատամարտում ԱրՊՀ-ի զոհված ուսանողների հիշատակը հավերժացնող հուշաքարին:
Բացման խոսքով միջոցառմանը հանդես է եկել ԱրՊՀ ռեկտոր Մանուշ Մինասյանը: Նա, ողջունելով ու շնորհավորելով ներկաներին, նշել է, որ արդեն բարի ավանդույթ է ձևավորվել, ԱՀ ակախության տոնին նվիրված՝ կրթական հաստատություններում կազմակերպել արիության դասեր:
Բուհի ռեկտորը ուսանողությանը հորդորել է ուսման բնագավառում լինել գիտելիքահեն, մրցունակ և ակտիվ:
Այս տարի ևս ԱրՊՀ ուսանողների համար արիության դասը վարել է ԱՀ ԱԺ նախագահ Աշոտ Ղուլյանը:
Նա շնորհավորել է մայր բուհի ուսանողության շարքերը համալրած առաջին կուրսեցիներին՝ մաղթելով նրանց ուսման մեջ մեծ նվաճումներ:
Ա. Ղուլյանն ասել է, որ ԱՀ իշխանությունները լուրջ ուշադրություն են դարձնում բուհի գործունեությանն ու զարգացմանը: Այսօր վերակառուցվում է համալսարանի գլխավոր մասնաշենքի մի հատվածը, որն իր հարմարություններով համապատասխանելու է միջազգային չափանիշներին. այն հնարավորություն է տալու լավագույն պայմաններ ապահովել ուսանողների՝ գիտելիքների ձեռքբերման գործում:
Դիմելով ուսանողությանը՝ Ա. Ղուլյանը մասնավորապես ասել է. «Այսօր մենք ունենք լուսավոր գաղափարներով, նպատակասլաց ուսանողություն: Դուք պետք է անընդհատ աշխատեք, ձեր թանկ ժամանակն օգտագործեք միայն գիտելիքներ ձեռք բերելու համար, որպեսզի մենք հետագայում ունենանք կայուն գիտելիքներ ունեցող մասնագետներ՝ պատրաստ լծվելու երկրի շենացման ու բարգավաճման գործին:
Թանկ գնով ձեռք բերված մեր անակախությունը դուք պիտի պահեք ու փոխանցեք գալիք սերունդներին: Մեզ անհրաժեշտ են հայրենասեր, գիտելիքներով զինված, պատրաստակամ սերունդ, որն ի զորու կլինի դիմակայել մեզ սպառնացող բոլոր մարտահրավերներին»:
ԱՀ ԿԳՍ նախարար Նարինե Աղաբալյանը ևս շնորհավորելով ուսանողներին և դասախոսներին՝ մաղթել է նրանց միշտ լինել ակտիվ ու գործունյա:
Նախարարը ուսանողներին ասել է, որ կարևորը է ոչ թե դիպլոմ ստանալն է, այլ դառնալ գործին գիտակ լավ մասնագետներ. միայն լավ մասնագետները կարող են աշխատել ու շենացնել երկիրը:
