Բրդի մշակմամբ և բրդյա թելերի արտադրությամբ զբաղվող «Ֆորեստ» ՍՊ ընկերությունն աշխատանքները սկսել է 2013 թվականի սեպտեմբերից, իր գործունեության տեսակով առայժմ միակն է Արցախում:
«Ֆորեստ» ՍՊ ընկերությունը ընթացիկ տարում նախատեսում է Արցախում բրդի վերամշակման ծավալները հասցնել 150-200 տոննայի
Բրդի մշակմամբ և բրդյա թելերի արտադրությամբ զբաղվող «Ֆորեստ» ՍՊ ընկերությունն աշխատանքները սկսել է 2013 թվականի սեպտեմբերից, իր գործունեության տեսակով առայժմ միակն է Արցախում: Նախորդ տարվա ընթացքում գործարանն ընդունել և մշակել է 30 տոննա բուրդ, իսկ ընթացիկ տարում նախատեսվում է այդ թիվը հասցնել 150-200 տոննայի:
Այս մասին «Արցախպրես»-ի թղթակցի հետ զրույցում տեղեկացրեց ընկերության տնօրեն Ինարա Պետրոսյանը` հավելելով, որ վերամշակված 25 տոննա բրդից անցյալ տարի 9,5 տոննա թել է ստացվել, որից կարողացել են իրացնել 8 տոննան: Ի. Պետրոսյանի խոսքով, անմշակ բուրդն ընդունում են ոչ միայն Արցախից, այլև ներկրում են ՀՀ Սյունիքի մարզից և Թուրքմենստանից:
«Առայժմ ընկերության կողմից բրդի ընդունման ծավալների սահմանափակում չի եղել: Կախված բրդի մաքրությունից, հնությունից և երկարությունից բրդի ընդունման արժեքը 1 կգ-ի դիմաց կազմում է 300- 400 դրամ»,-ասաց «Ֆորեստ» ընկերության ղեկավարը` նշելով, որ պատրաստի արտադրանքի հիմնական պատվիրատուն «Ղարաբաղ կարպետ» գորգագործական ընկերությունն է:
Ի. Պետրոսյանի հաղորդմամբ ներկայումս պատրաստվում են ընդլայնել իրացման շուկան և աշխարհագրությունը, որի շուրջ նախնական պայմանավորվածություններ ունեն ՀՀ և Ռուսաստանի Դաշնության համապատասխան ընկերությունների հետ: Ընկերության արտադրանքի իրացման շուկայի ընդլայնումը կնպաստի նաև բրդի ընդունման ծավալների ավելացմանը: Ներկայումս բրդի մշակման և թելերի արտադրության գործարանում աշխատում են 20 մարդ՝ ամսական 76-120 հազար դրամ միջին աշխատավարձով: Սակայն տնօրենը նշեց, որ մասնագետների խնդիր ունեն, որի պակասը առայժմ լրացնում են ՀՀ և արտասահմանյան համապատասխան մասնագետների խորհրդատվությունների միջոցով:
«Առաջիկայում նախատեսում ենք նաև բրդի ընդունումը կազմակերպել տեղերում, որտեղ ընկերության աշխատակիցները, նախապես պայմանավորվելով ոչխարաբուծությամբ զբաղվող անհատների կամ կազմակերպությունների հետ, կիրականացնեն ոչխարների խուզումն ու բրդի ընդունումը: Կարծում եմ, այն ոչ միայն հնարավորություն կտա այդ ճյուղով զբաղվող տնտեսվարողներին լրացուցիչ եկամուտներ ապահովելու, քանի որ, ինչպես գիտենք վերջին տարիներին մեր հանրապետությունում ի տարբերություն մսի, բրդի իրացման շուկան բացակայում էր, այլև նոր թափ կհաղորդի Արցախում ոչխարաբուծության զարգացմանը»,-ասաց Ի. Պետրոսյանը: