Այսօր Արցախի Ազգային վիճակախաղի գրասենյակում տեղի է ունեցել անցած տարվա դեկտեմբերի 28-ին կայացած խաղարկության շահումների առաջին փուլի հանձնման հանդիսավոր արարողությունը:
Հայտնի է դարձել «Արցախի ազգային վիճակախաղով» բնակարան շահած քաղաքացին
ՍՏԵՓԱՆԱԿԵՐՏ, 21 ՀՈՒՆՎԱՐԻ, ԱՐՑԱԽՊՐԵՍ։ Ինչպես «Արցախպրես»-ի թղթակցի հետ զրույցում նշեց շահած քաղաքացի Անդրանիկ Պողոսյանը, ով շահել է թթի օղու պարունակությամբ թթի փայտից 30 լիտրանոց տակառ, տոմսը գնելիս չի մտածել, որ կարող է շահել, սակայն ուրախ է, որ շահել է, և այս տարի ևս կմասնակցի խաղարկությանը։
Ստեփանակերտի բնակիչ Աշոտ Սարգսյանը, ով արցախյան զարդանախշերով գորգ է շահել, նշեց, որ նախաձեռնությունը շատ է գոհացրել իր ընտանիքի անդամներին, քանի որ այն նաև նշանակում է վերականգնել ազգային հարուստ ավանդույթները: «Մենք շարունակելու ենք գնել Ազգային վիճակախաղի տոմսեր, այնքան ժամանակ, մինչև որ բնակարան շահենք և այս սիրուն գորգը կախենք այդ բնակարանում»,- ժպտալով ասած Ա. Սարգսյանը։
«Արցախի ազգային վիճակախաղ» ՓԲԸ տնօրեն Ալեքսանդր Արզումանյանը «Արցախպրես»-ի թղթակցի հետ զրույցում նշեց, որ այսօր՝ շահումների հանձնման առաջին փուլին մասնակցել են Արցախի 8 քաղաքացիներ, որոնցից մեկը շահել է երկու գորգ։ «Երկրորդ փուլը տեղի կունենա Երևանում, որտեղ կհանձնենք 71 շահումներ։ Այնուհետև փուլ առ փուլ կսկսենք բաժանել մնացած շահումները»,-ասաց Ա. Արզումանյանը՝ հավելելով, որ շահողներ եղել են ԱՄՆ-ից, Հարավային Ամերիկայի երկրներից, Լիբանանից, Իրանի Իսլամական հանրապետությունից, Ֆրանսիայից, Ռուսաստանի Դաշնությունից և Կիպրոսից։
«Արցախի ազգային վիճակախաղ»-ի տնօրենի խոսքով, անցած տարի վիճակախաղի մրցանակային ֆոնդն, ընդհանուր առմամբ, կազմված է եղել 350 շահումից. արցախյան արտադրության գորգեր, թթի օղու պարունակությամբ և թթի փայտից պատրաստված 20 և 30 լիտրանոց տակառներ և մեկ բնակարան Ստեփանակերտում, որի շահողը, ի դեպ, արդեն հայտնի է և նա Իրանի Իսլամական հանրապետությունից է, սակայն անուն ազգանունը դեռևս ճշտվում է։
«2013թ.-ին՝ վիճակախաղի ստեղծման առաջին տարում, իրացվել են 261 505 տոմսեր, իսկ անցած տարի՝ 141.749 տոմսեր։ Սպառված տոմսերի քանակի նվազման հիմնական պատճառը, մեր կարծիքով, ստեղծված արտարժույթի ճգնաժամն էր, քանի որ, օրինակ, Ռուսաստանում ռուբլու կուրսը իջավ, իսկ դոլլարինը՝ բարձրացավ: Եվ քանի որ վիճակախաղի տոմսերը վաճառվում էին դոլլարով , մեկ տոմսի արժեքը այդ տատանումներից գրեթե երկու անգամ բարձրացավ»,-ասաց Ա. Արզումանյանը՝ հույս հայտնելով, որ այս տարի ավելի մեծ հաջողություններ կարձանագրվեն, քանի որ վիճակախաղից ստացած հասույթը կրկին կուղղվի վերաբնակեցման ծրագրին։
Նշենք, որ 2013թ-ին մեկնարկած վիճակախաղի ընթացքում հավաքագրված ֆինանսական միջոցները ուղղվել են Քաշաթաղի շրջանի Իշխանաձոր համայնքում 10 բնակարանների կառուցմանը: Ծրագրի շրջանակում նույն համայնքում նախատեսվում է կառուցել 37 առանձնատուն: