Ծիծեռնակաբերդում ներկայացված Համահայկական հռչակագիրը թուրքագետ Ռուբեն Սաֆրաստյանն անվանում է աննախադեպ երեւույթ:
Հռչակագրով ապացուցվեց, որ Հայաստանն ու սփյուռքը հանդես են գալիս միակամ. Ռուբեն Սաֆրաստյան
ՍՏԵՓԱՆԱԿԵՐՏ, 30 ՀՈՒՆՎԱՐԻ, ԱՐՑԱԽՊՐԵՍ։ Ըստ նրա, հռչակագրի ամենակարեւոր խորհուրդն այն է, որ մեր իրականության մեջ առաջին անգամ Հայաստանն ու սփյուռքը հանդես են եկել համատեղ հայտարարությամբ : «Հռչակագրում կա միասնական կամքը, որ դրսեւորեց հայ ժողովուրդը Հայոց ցեղասպանության տարելիցի նախաշեմին: 100-րդ տարելիցն ընկալվում է իրադարձություն, որը պահանջում է ուժերի լարում, միաժամանակ վկայում, որ Հայաստանն ու սփյուռքը հանդես են գալիս միակամ: Սա ամենալավ պատասխանն է այն քաղաքական գծին, որ ունեն թուրքական իշխանությունները: Հայտարարությունն ընդունվել է միաձայն, հետեւաբար Հայաստանի եւ սփյուռքի միջեւ սեպ խրելու թուրքական իշխանությունների ջանքերը չեն կարող հաջողություն ունենալ»,-ասաց Սաֆրաստյանը:
Հռչակագրում թուրքագետը կարեւորում է Հայոց ցեղասպանության հարցով իրավական պահանջի ներկայացումը: Նրա գնահատմամբ, սա Հայոց ցեղասպանության միջազգային ճանաչման ասպարեզում տասնամյակներ շարունակ Հայաստանի վարած գծի տրամաբանական շարունակությունն է:
«Իրավական պահանջը հասունացել է, եւ պետք է սկսենք աշխատանք ու տրամաբանական ավարտի հասցնենք Հայոց ցեղասպանության խնդիրը իրավական դաշտ տեղափոխելու հարցը: Սա պատմական նպատակ է: Մենք պայքարել ենք ճանաչման եւ դատապարտման համար, հիմա հասունացել է պահը, որ պայքարը տեղափոխվի իրավական դաշտ: Սա բարդ աշխատանք է, եւ պետք է պատշաճ մակարդակով աշխատանք տանել»,- ասաց Սաֆրաստյանը:
Ծիծեռնակաբերդի հուշահամալիրում հունվարի 29-ին տեղի է ունեցել Հայոց ցեղասպանության 100-րդ տարելիցի համահայկական հռչակագրի հրապարակման արարողությունը: Հռչակագիրը միաձայն ընդունվել է Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի նիստում: Փաստաթուղթն ընթերցել է Նախագահ Սերժ Սարգսյանը և, ի կատարումն Հայոց ցեղասպանության 100-րդ տարելիցի միջոցառումները համակարգող պետական հանձնաժողովի որոշման, հռչակագրի մայր օրինակը ի պահ է հանձնել Հայոց ցեղասպանության թանգարան-ինստիտուտին: Հանրապետության նախագահը նշել է, որ հռչակագրի մեկ օրինակը կուղարկվի ՄԱԿ-ի գլխավոր քարտուղարին, մեկ օրինակը կհանձնվի Հայաստանի Հանրապետության ազգային արխիվ: