Հայաստանը ՀԱՊԿ-ի միակ անդամ երկիրն է, որը մասնակցում է նաև ՆԱՏՕ-ի խաղաղապահ գործողություններին:
ԼՂ-ում խաղաղապահների տեղակայման հարցը կարող է քննարկվել. Ուիլյամ Լահյու
ՍՏԵՓԱՆԱԿԵՐՏ, նոյեմբերի 3, ԱՐՑԱԽՊՐԵՍ: ԹԵՐԹ,ամ-ի փոխանցմամբ՝ այս մասին այսօր լրագրողների հետ հանդիպման ժամանակ հայտարարեց Հարավային Կովկասում ՆԱՏՕ-ի կապի սպա Ուիլյամ Լահյուն:
«Մեր հարաբերությունները ՀՀ հետ կառուցված չեն մրցակցային հիմքի վրա: Դրանք կառուցված են գործընկերային շահերի հիմքում: ՆԱՏՕ-ի և Հայաստանի համագործակցության նպատակը հետևյալն է՝ օժանդակել խաղաղության և անվտանգության, կայունության հաստատմանը, ինչի վկայությունն է Հայաստանի մասնակցությունը միջազգային խաղաղապահ գործընթացին: ՀՀ-ն լիարժեքորեն օգտագործում է տրամադրված բոլոր գործիքները»,- նշեց Ուիլյամ Լահյուն՝ հավելելով, որ ՆԱՏՕ-ն Հայաստանի հետ ցանկություն ունի պահպանել ոչ միայն այն, ինչ կա, այլև՝ դիտարկել նոր համագործակցության հնարավորությունը:
«Առանցքային բանը, որը պետք է հիշել այն է, որ հենց գործընկերները ելնելով իրենց շահերից որոշում են, թե ինչ համագործակցություն են ուզում ունենալ դաշինքի հետ»,- նշեց Լահյուին:
Անդրադառնալով հայ-ադրբեջանական և ղարաբաղաադրբեջանական շփման գոտում պարբերական լարվածությանը, Հարավային Կովկասում ՆԱՏՕ-ի կապի սպան հայտարարեց, որ ՆԱՏՕ-ն աջակցում է ԼՂ հակամարտության խաղաղ կարգավորմանը:
«Ցանկացած երկիր, որը զինամթերք է տրամադրում հակամարտության կողմերից որևէ մեկին, փաստորեն, աջակցում է այս հակամարտության շարունակությանը: ՆԱՏՕ-ն անմիջապես չի մասնակցում կարգավորման գործընթացին, բայց մենք աջակցում ենք այն կազմակերպություններին, որոնք դրանով զբաղվում են: Այս խնդիրն իր բացասական ազդեցությունն է թողնում ողջ տարածաշրջանի վրա՝ ոչ միայն անվտանգության, այլև՝ տարածաշրջանի բարգավաճման տեսանկյունից»,- ընդգծեց բանախոսը:
Tert.am-ի հարցին, թե ինչ կարծիք ունի սահմանային վերջին միջադեպերից հետո շրջանառության մեջ դրված թեզերի մասին, թե Արցախում անհրաժեշտ է և հնարավոր է տեղակայվեն խաղաղապահ զորքեր, Ուիլյամ Լահյուն պատասխանեց, թե սա իսկապես հետաքրքիր հայեցակարգ է, սակայն ՆԱՏՕ-ի նպատակների մեջ չի մտնում: «Եթե Հայաստանը և Ադրբեջանը, և այլ ներգրաված կողմերը, միջազգային հանրության աջակցությամբ որոշեն, որ խաղաղապահների տեղակայումը կարող է նպաստավոր լինել հակամարտության կարգավորման համար, որ դա թույլ կտա վերջ տալ մարդկային կորուստներին, միգուցե հարցը քննարկվի»,- շեշտեց Ուիլյամ Լահյուն:
ՀՀ ԱԳՆ Սպառազինությունների վերահսկման և միջազգային անվտանգության վարչության պետ Սամվել Մկրտչյանն էլ պատասխանելով Tert.am-ի հարցին, ասաց, թե խաղաղապահ գործողությունների խնդիրը օրակարգում կա, սակայն, այն լինելու է հաջակցություն հակամարտության կարգավորման խաղաղապահ համաձայնագրի և չի կարող լինել մինչև համաձայնագրի կնքումը, որովհետև միայն դրանից հետո պարզ կլինի՝ ինչ բնույթ կկրի խաղաղապահ գործունեությունը:
