Լեռնային Ղարաբաղում խաղաղապահ զորքերի տեղակայումը հնարավոր է միայն հակամարտության քաղաքական կարգավորման պարագայում:
ԼՂ-ում խաղաղապահ զորքերի տեղակայման հարցը վաղ է քննարկել. Ջեյմս Ապաթուրայ
ՍՏԵՓԱՆԱԿԵՐՏ, դեկտեմբերի 17, ԱՐՑԱԽՊՐԵՍ: Tert.am-ի հետ զրույցում այս մասին ասաց Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ապպատուրայը՝ նշելով, որ քաղաքական կարգավորման նախադրյալներ այս պահին չկան:
Հարցին, թե ռուս-թուրքական հարաբերությունների սրացման արդյունքում ինչպիսի՞ն է ՆԱՏՕ-ի դիրքորոշումը ԼՂ-ում խաղաղապահների հնարավոր տեղակայման վերաբերյալ՝ հաշվի առնելով այն հանգամանքը, որ Հայաստանը ՀԱՊԿ անդամ է, Ջեյմս Ապպատուրայը պատասխանեց. «Վաղաժամ է քննարկել իրադարձությունների նման զարգացման հնարավորությունը, սցենարը: Մենք պետք է ձգտենք հասնել հարցի կարգավորմանը: Ես աջակցում եմ ԵԱՀԿ Մինսկի խմբի ջանքերի վերսկսումը, և 2016 թ.-ի արդյունքում ականատես կլինենք Հայաստանի և Ադրբեջանի միջև ավելի արդյունավետ երկխոսության»:
Անդրադառնալով ռուս-թուրքական հարաբերությունների սրացման ֆոնին ՆԱՏՕ-ի հետ համագործակցող Հարավային Կովկասի պետությունների ճակատագրին, Ապպատուրայը հավաստիացրեց, թե Թուրքիա-Ռուսաստան հարաբերությունները չեն ազդի այս տարածաշրջանի պետությունների հետ իրենց համագործակցության վրա:
«Մենք ընդունում ենք, որ երեք պետություններից ամեն մեկն ընտրել է անվտանգության իր սեփական քաղաքականությունը, որը մենք հարգում ենք: ՆԱՏՕ-ի հետ գործընկերային հարաբերություններ զարգացնելու համար պարտադիր չէ ձգտել անդամակցության: Մեզ հետ գործընկերային հարաբերություններ կարող է ունենալ և՛ ՀԱՊԿ անդամ երկիրը, և՛ Եվրամիության, և՛ այլ միջազգային, տարածաշրջանային կառույցների անդամը: Ես ուրախությամբ եմ ուզում նշել, որ այս առումով ՆԱՏՕ-ն ունի Հայաստանի և Վրաստանի կամ Վրաստանի և Ադրբեջանի հետ ավելի սերտ համագործակցության հիմքեր: Ամեն դեպքում, մեր կողմից տարվող ցանկացած համագործակցություն անհատական բնույթի է»,- նշեց նա:
Հարավային Կովկասում ու Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչը նշեց, որ Հայաստանի պարագայում մեր հիմնական փաստաթուղթը IPAP-ն է (Անհատական գործընկերության գործողությունների ծրագիր), որը շուրջ երկու տարի է, ինչ գործում է:
«Նման ծրագիր համաձայնեցված է նաև Ադրբեջանի հետ, այն դեպքում, երբ Վրաստանի հետ, օրինակ, գործում են միանգամայն այլ մեխանիզմներ՝ Թբիլիսիի կողմից ՆԱՏՕ-ին անդամակցելու պատրաստակամության համար: Մեր գործընկերային բոլոր հարաբերությունները աջակցվում են 28 կողմնակիցների, այդ թվում՝ Թուրքիայի կողմից: Մեր հարաբերությունները որևէ կերպ կախված չեն Ռուսաստանից, այնպես որ ես չեմ տեսնում ռուս-թուրքական հարաբերությունների վատթարացման պատճառով Հարավային Կովկասի պետությունների և ՆԱՏՕ-ի միջև հարաբերությունների վրա անմիջական ազդեցություն»,- ընդգծեց նա:
