Անցնող տարին, իր դժվարություններով հանդերձ, տնտեսական ձեռքբերումների տարի է: Այդ մասին այսօր կայացած տարեվերջյան մամլո ասուլիսում ասել է ԼՂՀ վարչապետ Արայիկ Հարությունյանը։
Անցնող տարին, դժվարություններով հանդերձ, տնտեսական ձեռքբերումների տարի է. ԼՂՀ վարչապետ
ՍՏԵՓԱՆԱԿԵՐՏ, դեկտեմբերի 25, ԱՐՑԱԽՊՐԵՍ: Կառավարության ղեկավարի խոսքով՝ տարին առանձնացել է տնտեսության տարբեր բնագավառներում արձանագրված ձեռքբերումներով, ժողովրդագրական բնական աճի և ՀՆԱ-ի բարձր ցուցանիշներով, ինչպես նաև՝ բյուջեի կատարողականի ապահովմամբ: Ա. Հարությունյանի խոսքով՝ արդեն իսկ սկսվել է Կաշենի հանքի շահագործումը, իսկ առաջիկայում հանքը կունենա իր ֆաբրիկան։ Անցնող տարում ակտիվ ընթացք է ունեցել բնակարանաշինության ծրագիրը, որը բարձր տեմպերով կշարունակվի նաև եկող տարի։ Բնակարանաշինությունը գալիք տարում կիրագործվի հիմնականում հանրապետության շրջաններում՝ պետական և բարեգործական միջոցների շնորհիվ։ Այս տարվանից մեկնարկել է գյուղաբնակներին բնակարանների կառուցման համար 3 միլիոն դրամ գումարի չափով աջակցության տրամադրման ծրագիրը, որից արդեն օգտվել է մոտ 30 շահառու։
Ծրագիրը շարունակական կլինի նաև 2016-ին։ Անդրադառնալով գալիք տարվա պետբյուջեով նախատեսվող ծրագրերի իրագործմանը՝ Ա. Հարությունյանն ասել է, որ չնայած թվային ցուցանիշներով այն քիչ կտարբերվի այս տարվանից, այնուհանդերձ, մի շարք ոլորտներում սոցիալական և տնտեսական մեկնարկային նոր նախագծերով զգալի փոփոխություններ են նախատեսվում: «2016թ. կմեկնարկի 5 և ավելի երեխա ունեցող ընտանիքների համար բնակարանաշինության ծրագիրը: Կառավարությունը կփոխհատուցի սպայական անձնակազմի ուսանող երեխաների ուսման վարձերը՝ դրանով փոքր-ինչ թեթևացնելով սպաների ընտանիքների սոցիալական բեռը: Նոր ծրագրեր ենք նախատեսում առողջապահության և գյուղատնտեսության բնագավառներում, խոշոր ներդրումներ կկատարվեն նաև հիդրոէներգետիկայի ոլորտում»,- մանրամասնել է գործադիրի ղեկավարը:
Ա. Հարությունյանի հաղորդմամբ՝ գալիք տարվանից կմեկնարկեն փախստականների ընտանիքներին բնակարաններով ապահովելու նպատակով ուսումնասիրությունները։ «Առաջիկայում մոտ 2000 փախստականի բնակարանային պայմաններով ապահովելու հարցում տեղաշարժ կլինի», - հավաստիացրել է վարչապետը։