ԼՂՀ կառավարության որոշմամբ փոփոխություն է կատարվել ՝ «Լեռնային Ղարաբաղի Հանրապետության գյուղական կամ քաղաքային՝ բացառությամբ Ստեփանակերտ և Շուշի քաղաքների, բնակավայրերում մշտապես բնակվող երիտասարդ ընտանիքներին բնակելի տներ կառուցելու նպատակով անհատույց պետական ֆինանսական աջակցություն տրամադրելու մասին» որոշման մեջ, որով վերանայվել է նախորդ որոշմամբ հաստատված երիտասարդ ընտանիքի համար սահմանված տարիքային ցենզը:
Մեկնարկել է բնակարան կառուցելու համար պետական դրամաշնորհից օգտվելու հայտերի ընդունման գործընթացը
ՍՏԵՓԱՆԱԿԵՐՏ, 23 մարտի, ԱՐՑԱԽՊՐԵՍ: «Արցախպրես»-ի թղթակցի հետ զրույցում «Արցախի սոցիալական ծրագրերի հիմնադրամ»-ի տնօրեն Մարատ Հասրաթյանը տեղեկացրել է, որ հանրապետության շրջաններում բնակարանաշինությունը խթանող ծրագրի փոփոխված տարբերակն ուժի մեջ է մտել ընթացիկ տարվա մարտի 21-ից, իսկ այսօր ընդունվել է առաջին հայտը:
Մ. Հասրաթյանը նշել է, որ փոփոխության արդյունքում, նախկին 18-35 տարեկանի փոխարեն՝ ծրագրից կարող են օգտվել 18-40 տարեկան ամուսիններից կազմված, հանրապետության գյուղական կամ քաղաքային՝ բացառությամբ Ստեփանակերտ և Շուշի քաղաքների, բնակավայրում մշտապես բնակվող ընտանիքները:
Նրա խոսքով՝ բնակարան կառուցելու համար տրամադրվող պետական անհատույց աջակցության գյուղաբնակ ընտանիքների տարիքային ցենզի բարձրացումը պայմանավորված է ծրագրում` ներկայումս բնակարան կառուցող մինչև 40 տարեկան ամուսիններից կազմված ընտանիքներին, ինչպես նաև ավելի շատ շահառուներ ընդգրկելու պահանջարկով, քանի որ նախկինում սահմանված տարիքային խմբին պատկանող ընտանիքները մեծամասամբ արդեն դիմել և օգտվել են ծրագրից:
«Անցած տարի ծրագիրը լիարժեք իրագործվել է: Բոլոր ներկայացված հայտերը բավարարվել են: Այս տարի հայտերի՝ նախատեսվածից ավելին լինելու դեպքում, եթե չկարողանանք պետբյուջեից հատկացված ֆինանսական միջոցների շրջանակներում բավարարել բոլոր հայտերը, ապա լրացուցիչ ֆինանսական միջոցներ կներգրավենք նաև այլ աղբյուրներից: Այնպես, որ ծրագրի պահանջներին համապատասխանող հայտերի սահմանափակում չի լինելու»,- ասել է Մ. Հասրաթյանը:
Անդրադառնալով տարիքային սահմանափակումն ընդհանրապես բացառելու հնարավորությանը, հիմնադրամի տնօրենը հայտնել է, որ ԼՂՀ վարչապետ Արայիկ Հարությունյանի հանձնարարությամբ ներկայումս իրավասու մարմինների կողմից համապատասխան ուսումնասիրություններ են տարվում շրջաններում բնակարանային կարիքները ցուցակագրելու առումով, որը հիմք կհանդիսանա ծրագրի հետագա իրագործման համար:
«Այն, որ ծրագիրը շրջկենտրոններում և գյուղերում բնակարանաշինության խթանման առումով արդյունավետ է, կայացած փաստ է: Ծրագրի մեկնարկից հետո, անցած տարի դրամաշնորհից օգտվել է շուրջ 40 ընտանիք, որոնցից, մեր ունեցած տվյալների համաձայն, 7-8 ընտանիք տրամադրված աջակցության շնորհիվ արդեն ավարտել է բնակարանի կառուցումը»,- նշել է Մ. Հասրաթյանը:
Խոսելով շրջանների բնակիչներին բնակարանաշինության համար տրամադրվող մինչև 3 միլիոն դրամ գումարի չափով անհատույց պետական ֆինանսական աջակցության նպատակային օգտագործման վերահսկողական մեխանիզմների մասին, «Արցախի սոցիալական ծրագրերի հիմնադրամ»-ի տնօրենն այդ առումով նախ կարևորել է շահառուների բարեխիղճ մոտեցումը՝ հավելելով, որ, բացի այդ, հիմնադրամի համապատասխան մասնագետները, հայտի ընդունումից հետո՝ ընդհուպ մինչև շինարարության ավարտը վերահսկում են ամբողջ գործընթացը, ինչի արդյունքում բացառվում է պետական դրամաշնորհի ոչ նպատակային օգտագործումը: