Ռոբերտ Ուոլթերի զեկույցի պարագայում ԵԽԽՎ-ում հաղթեց բանական մոտեցումը։
Ուոլթերի զեկույցն իր կշռով չի կարող հավասարվել Մարկովիչի զեկույցին. Կարեն Բեքարյան
ՍՏԵՓԱՆԱԿԵՐՏ, հունվարի 27, ԱՐՑԱԽՊՐԵՍ: Այս մասին հունվարի 27-ին կայացած մամուլի ասուլիսի ժամանակ ասել է ԱԺ ՀՀԿ խմբակցության պատգամավոր, «Եվրոպական ինտեգրացիա» ՀԿ նախագահ Կարեն Բեքարյանը։
Նրա խոսքով՝ այստեղ պետք է հաշվի առնել, որ դա ԵԽԽՎ-ում հայկական պատվիրակության գործունեության արդյունք է։ Պատգամավորի կարծիքով որոշակի գործոններ, այդ թվում՝ Լեռնային Ղարաբաղի Հանրապետության խորհրդարանի պատգամավորների եւ ԵԱՀԿ ՄԽ համանախագահների հայտարարությունները նույնպես խաղացել են իրենց դերը, ընդ որում Մինսկի խմբի ուղերձը հստակ հասցեավորված էր, հաղորդում է NEWS.am-ը։
«Եվրոպայի խորհուրդը որեւէ փորձ եւ մանդատ չունի քաղաքական հակամարտությունների լուծման գործում։ Այս դեպքում կազմակերպությունը դուրս է գալիս իր լիազորությունների շրջանակներից»,- ընդգծել է Կարեն Բեքարյանը։
Նա նշել է, որ Ուոլթերի զեկույցը իր կշռով եւ նշանակությամբ չի կարող հավասարվել Մարկովիչի զեկույցին։ «ԵԽԽՎ բանաձեւերը որեւէ իրավական ուժ չունեն, նրանք ընդամենը ցույց են տալիս քաղաքական տրամադրությունը։ Դա նշանակում է, որ նշված զեկույցները չնչին նշանակություն ունեն քաղաքական լուծումների գործընթացում»,- եզրափակել է Բեքարյանը։
Նշենք, որ հունվարի 26-ին ԵԽԽՎ–ն քվեարկությամբ մերժել էր բրիտանացի պատգամավոր Ռոբերտ Ուոլթերի «Բռնության աճը Լեռնային Ղարաբաղում եւ Ադրբեջանի այլ գրավյալ տարածքներում» թեմայով զեկույցը, սակայն ընդունել էր բոսնիացի պատգամավոր Միլիցա Մարկովիչի «Ադրբեջանի սահմանամերձ շրջանների բնակիչները միտումնավոր զրկված են ջրից» թեմայով հակահայկական զեկույցը։