Վերջին 5 տարիներին ԼՂՀ գյուղի և գյուղատնտեսության աջակցության հիմնադրամի միջոցով Գերմանիայից և այլ զարգացած արտասահմանյան երկրներից հանրապետություն է ներկրվել ու լիզինգի կարգով տնտեսվարող սուբյեկտներին տրամադրվել 1441 միավոր գյուղատնտեսական տեխնիկա և ագրեգատներ` ընդհանուր առմամբ 4 միլիարդ 533 միլիոն դրամ արժեքով:
Հանրապետության շրջաններում կտեղադրվի ոռոգման անձրևային 11 համակարգ
ՍՏԵՓԱՆԱԿԵՐՏ, փետրվարի 5, ԱՐՑԱԽՊՐԵՍ: Այդ մասին այսօր կայացած մամլո ասուլիսում ասել է ԼՂՀ գյուղի և գյուղատնտեսության աջակցության հիմնադրամի տնօրեն Աշոտ Բախշիյանը՝ մանրամասնելով, որ գյուղտեխնիկայի ներկրման նպատակով հիմնադրամն ամեն տարի համագործակցության պայմանագրեր է կնքում տարբեր կազմակերպությունների հետ:
«Այսօրվա դրությամբ արդեն ներկրել ենք բելառուսական մակնիշի 80 տրակտոր և լիզինգի կարգով տրամադրել հանրապետության հողօգտագործողներին ու ֆերմերներին: Անցած տարում հանրապետություն ենք ներկրել 30 տրակտոր, որոնցից 20-ը գերմանական, իսկ 10-ը՝ հայկական արտադրության»,-ասել է Ա. Բախշիյանը:
Հիմնադրամի տնօրենի խոսքով՝ կառույցն իր գործունեությունը փորձում է է իրականացնել նոր տեխնոլոգիաների ներդրման միջոցով: Այդ առումով՝ բացառիկ իրողություն է եղել մասնավորապես Թալիշի ենթաշրջանում և Ասկերանի շրջանի Ակնայի տարածքում ոռոգման անձրևային 3 համակարգերի գործարկումը:
«Այդ համակարգերը իրենց տեսակով առաջինն են Արցախում և եզակիներից մեկը՝ տարածաշրջանում: Նախատեսվում է նման ևս 11 համակարգերի տեղադրումը հանրապետության այլ շրջաններում»,-մանրամասնել է Ա. Բախշիյանը:
Անդրադառնալով վերամշակող ձեռնարկություններին ցուցաբերվող աջակցությանը՝ Ա. Բախշիյանը նշել է, որ ԳԳՀ-ի գործունեության մեջ մշտապես կարևորվում է վերամշակող ձեռնարկությունների ստեղծումն ու զարգացումը, քանի որ գյուղատնտեսությունն առանց ագրովերամշակման համակարգի չի կարող զարգանալ:
«Մարտունու շրջանի Թաղավարդ գյուղում կառուցված է ձեթի ժամանակակից գործարան, որը տարեկան, միայն արևածաղկից շուրջ 1000 տոննա արտադրանք է թողարկում: Հանրապետությունում գործում են նաև թռչնաբուծական ընկերություն, որը տարեկան արտադրում է 800-850 տոննա թռչնամիս, մսի և կաթի, պտուղ-բանջարեղենի և մրգեղենի վերամշակման ընկերություններ, որոնք տնտեսական կայուն աճ են ապահովում մեր երկրի համախառն ներքին արդյունքում»,-ասել է հիմնադրամի տնօրենը:
