Թիկունքային և ինժեներական աշխատանքները պաշտպանության բանակի հետ համադրելու համար ԼՂՀ կառավարությունը ստեղծել է օպերատիվ շտաբ, որը գլխավորում է ԼՂՀ վարչապետը:
Սննդամթերքի բաշխման գործընթացն իրականացվում է կենտրոնացված կարգով. Աշոտ Բախշիյան
ՍՏԵՓԱՆԱԿԵՐՏ, 15 ապրիլի, ԱՐՑԱԽՊՐԵՍ: Ստեղծված օպերատիվ շտաբի պարենային ծառայության պատասխանատու ԼՂՀ գյուղի և գյուղատնտեսության աջակցության հիմնադրամի տնօրեն Աշոտ Բախշիյանը «Արցախպրես»-ի թղթակցի հետ զրույցում նշել է, որ այս պահի դրությամբ մոտավոր 418 մլն դրամի սնունդ է ընդունվել:
«Բաշխման գործընթացն իրականացվում է կենտրոնացված կարգով. ՊԲ թիկունքային համապատասխան ծառայության միջոցով այն ուղարկվում է առաջնագիծ: ՊԲ զորամասեր և առաջնագիծ սննդամթերք և այլ անհրաժեշտ պարագաներ տանելու համար մի քանի անգամ ինքս եմ գնացել: Ստացված սննդամթերքը բաժանվում է նաև Մարտակերտի շրջանից ժամանակավորապես տարհանված բնակչությանը»,-ասել է Ա. Բախշիյանը և ընդգծել, որ սնունդ է ուղարկվում նաև կամավորականներին ու նրանց ընտանիքներին և պաշտպանության բանակի սպաների ընտանիքներին:
Ըստ Ա. Բախշիյանի՝ մեկ արկղի արժեքը մոտավոր կազմում է 25. 000 դրամ:
«Ապրիլի 11-ին շտաբը հայտարարությամբ հանդես է եկել, որ սննդի առաքումը դադարեցնեն: Ներկայումս հավաքված սննդամթերքը պահեստավորված է պահեստներում: Ամեն օր, ըստ իրենց պահանջի, համապատասխան ծառայությունները գալիս և տանում են մոտ 20-40 տոննա սննդամթերք: ՀՀ արտակարգ իրավիճակների ծառայության և Երևանի Մաշտոցի պուրակի ակտիվիստների հավաքագրած սննդամթերքները ուղիղ հասցվել են զորամասեր»,- մանրամասնել է Ա. Բախշիյանը և հավելել, որ տարհանված բնակչությունը և ՊԲ զորամասերը սննդով լրիվությամբ ապահովված են: Ա. Բախշիյանի խոսքով՝ հենց այսօր էլ պահեստ են ուղարկվել 2 մեքենա ալյուր, շաքարավազ, ձեթ, որոնք երկարատև պիտանելիության ժամկետ ունեցող սննդամթերք են:
«Նորից ենք հորդորում օգնություն ուղարկողներին. այս պահի դրությամբ սննդով լրիվ ապահովված ենք, և եթե իրավիճակի փոփոխություններ լինեն, շտաբը հանդես կգա համապատասխան հայտարարությամբ»,- ասել է օպերատիվ շտաբի պարենային ծառայության պատասխանատուն:
Այն հարցին, թե խոսակցություններ կան, որ իբր վերահսկողությունը թույլ է, և ուղարկված սննադամթերքը ամբողջությամբ նպատակին չի ծառայում, ինչքանով է համապատասխանում իրականությանը՝ Ա. Բախշիյանը պատասխանեց, որ ոչ հավաստի խոսակցությունները անբարոյական է այնքանով, որքանով որևէ մեկը իրեն թույլ կտար այդ հարցում անբարեխիղճ աշխատել:
«Մեր աշխատանքն այդ առումով բաց է բոլոր նրանց համար, ովքեր ցանկություն ունեն լրացուցիչ վերահսկողություն իրականացնել, իսկ եթե չարաշահման որևէ փաստ է արձանագրվել ինչ-որ մեկի կողմից խնդրում և պահանջում եմ թող ներկայացնեն մեզ, խոստանում ենք հրապարակավ համապատասխան պատժի ենթարկել մեղավորներին»,- խոսքն ամփոփել է Ա. Բախշիյանը:
