Ադրբեջանում ոստիկանությունը խոչընդոտում է հանրահավաքի անցկացմանը:
Բաքվում պահանջում են Ալիեւների իշխող ռեժիմի հրաժարականը
ՍՏԵՓԱՆԱԿԵՐՏ, 17 սեպտեմբերի, ԱՐՑԱԽՊՐԵՍ։ Ինչպես հաղորդում է contact.az-ը, ոստիկանությունը շատ շրջաններում ձերբակալել եւ հետ է վերադարձրել հարյուրավոր ակտիվիստների, որոնք ցանկանում էին մասնակցել Բաքվում ընթացող հանրահավաքին: Նման բան տեղի է ունեցել Սումգայիթում, Ագսուում, Սաաթլիում, Սաբիրաբադում:
Հանրահավաքում «Ադրբեջանի Ազգային ճակատ» կուսակցության փոխնախագահ Գազել Բայրամլին դատապարտել է իշխանությունների սոցիալական քաղաքականությունը՝ ուշադրություն դարձնելով նրան, որ 17 հազար ուսանողներ ստիպված են եղել թողնել ուսումը, քանի որ չեն կարողանում վճարել ուսման վարձը:
Տասնյակ այդպիսի ուսանողներ ինքնասպան են եղել. «Ինչու երիտասարդները պետք է ինքնասպան լինեն, որն է նրանց մեղքը: Ինքնասպան պետք է լինի Իլհամ Ալիեւի ընտանիքը, որը միլիարդավոր դոլարներ է գողացել նավթից ու դուրս բերել երկրից: Մենք «ոչ» ենք ասում այս կոռուպցիոն, ավրոտիտար ռեժիմին: Այս ռեժիմին եւ Իլհամ Ալիեւին չի հետաքրքրում երիտասարդության ճակատագիրը, նրան ավելի շատ հուզում է «Ֆորմուլա-1»-ը»,-ասել է նա:
Միաժամանակ, «Ադրբեջանի Ազգային ճակատ» կուսակցության նախագահ Ալի Քերիմլին հայտնել է, որ այսօր ոստիկանությունը կալանավորել է 51 մարդու, իրենց կուսակցության անդամներին, որոնք ցանկացել են մասնակցել հանրահավաքին:
Քերիմլին ասել է, որ «ժողովուրդը դեմ է Սահմանադրության փոփոխություններին՝ հօգուտ Ալիեւի ընտանիքի»:
Քերիմլիի ելույթն ընդհատվում էր «Հրաժարական» եւ «հեռացիր» վանկարկումներով:
Ցուցարարները պաստառներ են պարզել հետեւյալ բովանդակությամբ. «Որտեղ է գողացված 140 մլրդ դոլարը», «Մենք ձեզ չենք ընտրել», «Աշխատավարձը՝ 105 մանաթ, ուսման վարձը՝ 4000 մանա՞թ», «ԵՄ-ի հետ ասոցացման համաձայնագիր ստորագրել»:
Նշենք, որ սահմանադրական փոփոխությունները չեղյալ հայտարարելու պահանջով, որի հանրաքվեն տեղի է ունենալու սեպտեմբերի 26-ին, հանրահավաքին մասնակցում են հազարավոր մարդիկ: Չնայած անձրեւին, ակցիայի մասնակիցները թիվն ավելանում է: Ոստիկանությունը կենդանի շղթայով շրջափակել է մարզադաշտը:
