Վերջին մեկ ամսվա ընթացքում մի շարք միջհամայնքային երթուղիների սպասարկման ուղեվարձերը թանկացել են:
Ինչո՞ւ են թանկացել միջհամայնքային որոշ երթուղիների ուղեվարձերը. պատասխանատուների հիմնավորումները
ՍՏԵՓԱՆԱԿԵՐՏ, դեկտեմբերի 2, ԱՐՑԱԽՊՐԵՍ: «Արցախպրես»-ի թղթակցի հետ զրույցում այն հարցին, թե ինչո՞վ է պայմանավորված միջհամայնքային երթուղիների սպասարկման ուղեվարձերի թանկացումները, ԼՂՀ էկոնոմիկայի փոխնախարար Տիգրան Գաբրիելյանը պատասխանել է. «2011-2016 թթ. ահագին փոփոխություններ են տեղի ունեցել պահեստամասերի, վառելիքաքսուքային նյութերի, նվազագույն աշխատավարձերի մասով, և այս բոլորը հանդիսանում են սակագնի ձևավորման բաղադրիչներ: Վերոնշյալը հաշվի առնելով նախարարությունը պարտավոր է պարբերաբար վերահաշվարկել առավելագույն շեմերը, որպեսզի շուկան կարողանա կայուն պահպանվի և հնարավորինս զերծ մնա գործող երթուղիների խափանումներից: Պետք է ասենք, որ այս վերջին շրջանում ունենք օրինակներ, որ ցածր ուղևորահոսքի, անբարենպաստ ենթակառուցվածքի և այլ պատճառներով երթուղիները փակվել են: Եվ որպեսզի կարողանանք պահպանել գործող կանոնավոր փոխադրումների երթուղային ցանցը, տարրատեսակ միջոցառումներ ենք իրականացնում, որից մեկն էլ ճիշտ սակագնային քաղաքականությունն է: Յուրաքանչյուր երթուղի բիզնես տեսանկյունից պիտի գրավիչ լինի փոխադրողի համար, որպեսզի դրա մրցույթը կայանա»:
Փոխնախարարի խոսքով, վերջին տարիներին անկում է ապրել նաև փոքրաթիվ համայնքներին սպասարկող երթուղիների մասով ուղևորահոսքը: Պատճառն ըստ Գաբրիելյանի, պայմանավորված է մի շարք հանգամանքներով: Մասնավորապես, նշված համայնքներում տարեցտարի ավելանում են սեփական մեքենաների թիվը, համայնքներում աճ է արձանագրվում նաև տաքսամոտորային փոխադրումների մասով: Այս ամենը համապատասխանաբար իր բացասական ազդեցությունն է թողնում կանոնավոր փոխադրումների վրա:
Ստեփանակերտի կենտրոնական ավտոկայանի անվտանգության ապահովման և շահագործման բաժնի պետ Շահեն Գասպարյանն էլ հաստատել է, որ թվով 20 միջհամայնքային երթուղիների տրանսպորտի ուղեվարձերը ավելացվել են 100-200 դրամով:
«Օրինակ, դեպի Ստեփանակերտ Մարտունու շրջանի Բերդաշեն միջհամայնքային երթուղայինի տոմսի արժեքը, նախկին 700-ի փոխարեն, 800 դրամ է, Ճարտար քաղաքինը 900 դրամից հասել է 1000-ի, Սոս համայնքինը` 800 էր, այժմ` 1000, Հադրութի շրջանի Դրախտիկ համայնքինը` 700-ից հասցվել է 800-ի և այլն»,- մանրամասնել է Շ. Գասպարյանը:
Ի դեպ, Խորհրդարանի վերջին լիագումար նիստում օրենսդիր-գործադիր հարց ու պատասխանի ժամանակ պատգամավորների կողմից թեմայի վերաբերյալ բարձրացված հարցին ի պատասխան՝ ԼՂՀ էկոնոմիկայի նախարար Անդրանիկ Խաչատրյանը խոստացել է այն լրացուցիչ քննարկել:
