Արաբագետ Արմեն Պետրոսյանը հակահայկականություն չի տեսնում այն բանում, որ Իրաքում «Իսլամական պետություն»-ը հայկական «Ախթամար» ծխախոտի մեծ խմբաքանակ է հրապարակայնորեն այրել:
«Ախթամարի» հետ այրվել են նաև այլ ծխախոտներ. ըստ արաբագետի և «Գրանդ Տոբակո»-ի՝ հայկական ծխախոտը ԻՊ-ը միտումնավոր չի այրել
ՍՏԵՓԱՆԱԿԵՐՏ, հունվարի 12, ԱՐՑԱԽՊՐԵՍ: Tert.am-ի հետ զրույցում նա ասաց, որ նույն տրամաբանությամբ կարող են այրվել այլ ծխախոտներ, որովհետև «Իսլամական պետության» վերահսկողության տակ գտնվող տարածքներում ծխելը և ալկոհոլ օգտագործելը խստիվ արգելվում է:
«Եթե խոսենք Իսլամական պետության»՝ Հայաստանի կամ հայ համայնքի նկատմամբ ունեցած վերաբերմունքից, պետք է նկատենք, որ մենք գտնվում ենք նույն սպառնալիքի տակ, ինչ Արևմուտքը և ողջ քրիստոնեական աշխարհը»,- ասաց Արմեն Պետրոսյանը: Նա նաև նշեց, որ Իսլամական պետության համար շատ ավելի առաջնային է կրոնական պատկանելությունը, քան ազգայինը:
Հիշեցնենք, որ այսօր լրատվամիջոցներով տարածվել է տեղեկատվություն, ըստ որի «Իսլամական պետություն» ահաբեկչական խմբավորման կրոնական ոստիկանությունը՝ Հիսբահը, Իրաքի Նայնավա քաղաքում հրապարակայնորեն վառել է հայաստանյան արտադրության հայտնի «Աղթամար» տեսակի ծխախոտի մեծ խմբաքանակ: Ըստ իրաքյան լրատվամիջոցների՝ «Աղթամար»-ը Իրաքում և Սիրիայում ամենահարգի ծխախոտներից է:
Լրատվամիջոցների ուշադրությունը գրավել է նաև այն, որ արդեն երրորդ դեպքն է, որ գրոհայինները հայաստանյան արտադրության ծխախոտի մեծ խմբաքանակ են ոչնչացնում: Ավելի վաղ՝ 2016 թվականի փետրվարին համացանցում տարածված նկարներից երևում էր, որ թե ինչպես են գրոհայինները Մոսուլում ավտոմեքենաների բեռնաթափքից դատարկում «Աղթամար»-ի տուփերը և այն վառում:
Tert.am-ը թեմայի վերաբերյալ մեկնաբանություն վերցրեց նաև ծխախոտն արտադրող «Գրանդ Տոբակո» ընկերությունից: Այստեղ մեզ ասացին, որ տեղեկատվությանը տիրապետում են այնչափ, որչափ տարածված է լրատվամիջոցներով: «Մենք էլ ձեր նման այդ մասին իմանում ենք լրատվամիջոցներից: Միայն կարող ենք ասել, որ «Ախթամարի» հետ այրվել են նաև այլ ծխախոտներ»: