«Զինված ուժերում չկա որևէ ապրանքատեսակ կամ ծառայություն, որի մատակարարումն իրականացվում է հովանավորչության միջոցով»,-հայտարարել է ՊՆ նյութատեխնիկական ապահովման դեպարտամենտի պետ Կարեն Կարապետյանն՝ իրային ապահովման ոլորտում ապրանքներ ու ծառայություններ առաջարկող կազմակերպությունների հետ հանդիպման ժամանակ:
ՊՆ պաշտոնյա. ԶՈՒ-ում չկա ապրանքատեսակ, որի մատակարարումն իրականացվում է հովանավորչության միջոցով
ՍՏԵՓԱՆԱԿԵՐՏ, մարտի 2, ԱՐՑԱԽՊՐԵՍ: «Մենք բացառում ենք նման երևույթները: Դաշտն ազատ է մրցունակ գին և որակյալ ապրանք կամ ծառայություն առաջարկող ընկերությունների համար»,- վստահեցրել է ՊՆ նյութատեխնիկական ապահովման դեպարտամենտի պետ Կարեն Կարապետյանը, նշելով, որ նման հանդիպումների նպատակն այն է, որ թե՛ հանրությունը և թե՛ հայտարարվող մրցույթներին մասնակցող ընկերությունները համոզված լինեն դրանում:
ՊՆ տեղեկատվության և հասարակայնության հետ կապերի վարչության հաղորդմամբ, դիմելով հանդիպմանը ներկա կազմակերպությունների ներկայացուցիչներին՝ Կարեն Կարապետյանը հիշեցրել է, որ ՊՆ-ում գործում է թեժ գիծ՝ ի հայտ եկած խնդիրներն արագ լուծելու համար:
«Բոլոր գործարարներին հորդորում ենք՝ եթե կլինեն բուն մրցութային գործընթացին առնչվող անհասկանալի հարցեր, ինչպես նաև ապրանքների ընդունման-հանձնման, ապրանքների տեխնիկական բնութագրերի կամ վճարումների հետ կապված որոշակի խնդիրներ, պարտադիր զանգահարել թեժ գիծ կամ գրություն ուղարկել ՊՆ»,- ընդգծել է նյութատեխնիկական ապահովման դեպարտամենտի պետը:
Հանդիպման մասնակիցներին ներկայացվել են նաև առաջիկայում կայանալիք մրցույթներում ընդգրկված ապրանքների ու անհրաժեշտ փաստաթղթերի ցանկը, դրանց ճիշտ լրացման կարգը: Կարեն Կարապետյանը փաստել է, որ նմանօրինակ հանդիպումները դրական արդյունք են տալիս: Այդ մասին է վկայում մրցույթներին մասնակցել ցանկացողներ ընկերությունների քանակը, որը հաստատուն տեմպերով աճում է:
«Մարդիկ աստիճանաբար համոզվում են, որ սրանք լոկ խոսքեր չեն, կատարվում են ամենօրյա հետևողական աշխատանք և խիստ վերահսկողություն, որպեսզի իրականում ունենանք մրցունակ գին ու որակյալ ապրանք»,-ասել է նա: