Թուրքիայի արտգործնախարար Մեւլութ Չավուշօղլուն կոչ է արել Կիպրոսի հույներին հույս չունենալ, որ թուրքական 35 հազարանոց զորամիավորումը երբեւէ կլքի կղզին:
Չավուշօղլուն կոչ է արել հույներին դադարել երազել. «Զորքերը դուրս չենք բերելու»
ՍՏԵՓԱՆԱԿԵՐՏ, 1 հուլիսի, ԱՐՑԱԽՊՐԵՍ: «Դա իրենց երազանքն է: Նրանք պետք է սթափվեն եւ դադարեն երազել»,- հայտարարել է Թուրքիայի արտգործնախարար Մեւլութ Չավուշօղլուն շվեյցարական Քրանս-Մոնտանայում ընթացող ՄԱԿ-ի միջնորդած բանակցությունների ընթացքում, հայտնում է news.am-ը:
Ըստ Չավուշօղլու, այս բանակցությունները Կիպրոսի հակամարտության կարգավորման վերջին փորձն են:
«Մենք չենք պատրաստվում հավերժ բանակցել այս խնդրի շուրջ: Այն պետք է ավարտվի: Եթե խնդիրը պետք է կարգավորվի, դա տեղի կունենա: Եթե ոչ, ապա բանակցությունների ձեւաչափը պետք է փոխել: Մենք կբանակցենք ուրիշ հարցերի շուրջ: Սա սկիզբն է, ուստի դեռեւս անհրաժեշտություն չկա քննարկելու այլընտրանքային ծրագրեր: Պետք է կենտրոնանալ այս բանակցությունների միջոցով խնդրի կարգավորմանը հասնելու վրա»,- հայտարարել է Չավուշօղլուն։
Հունաստանի արտգործնախարար Նիկոս Կոտզիասը արձագանքել է, որ թուրքական կողմի այդ դիրքորոշումը նորություն չէ:
Կիպրոսի հույները պահանջում են, որ Թուրքիան դուրս բերի իր զորամիավորումները Կիպրոսից: Այս պահանջը կղզու վերամիավորման հիմնական խոչընդոտներից է:
Կիպրոսի թուրքերը ցանկանում են, որ թուրքական զորքերը չհեռանան կղզուց, իրենց անվտանգության նկատառումներից ելնելով, սակայն հունական կողմը պնդում է, որ թուրքական զորքերի ներկայությունը սպառնալիք է կղզու կայունությանը:
Թուրքիայի բանակը ներխուժել է Կիպրոս 1974 թվականին, այն բանից հետո, երբ Նիկոսիայում տեղի ունեցավ պետական հեղաշրջում, որի նպատակն էր միավորելու կղզին Հունաստանի հետ: Այդ ժամանակներից ի վեր կղզին բաժանված է թուրքական եւ հունական հատվածների, որոնց բաժանում են ՄԱԿ-ի խաղաղապահ ուժերը:
Թուրքական Հյուսիսային Կիպրոսի պետականությունը ճանաչել է միայն Թուրքիան:
