ԱՀ Մարտունի քաղաքում գործող «Տնջրի 2000» կոոպերատիվ արտադրամասը հրուշակեղենի, ոչ ալկոհոլային խմիչքների, հացաբուլկեղենի կողքին ավելացրել է նաև նոր տեսականիներ՝ համալրելով գինու, սառը թեյի և սուրճի արտադրությունը:
Մարտունիում գործող «Տնջրի 2000» ընկերությունը համալրվում է նոր արտադրատեսակներով
ՍՏԵՓԱՆԱԿԵՐՏ, 23 օգոստոսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ընկերության սեփականատեր Հայասեր Գասպարյանը: Նրա խոսքով դեռևս ամենասկզբից` երբ իրենք նոր էին սկսել անհատ ձեռնարկատիրությամբ զբաղվել, կենտրոնացված էին միայն մեկ տեսականու՝ կոնֆետի արտադրության վրա:
«1987 թվականին Կարմիր Շուկայում բացեցինք հրուշակեղենի արտադրություն: Երբ արցախյան պատերազմը սկսվեց, որոշ ժամանակով աշխատանքները դադարեցվեցին: Արդեն 1994 թվականին Մարտունիում վերսկսեցինք հացաբուլկեղենի արտադրությունը»,- ավելացրել է Հ. Գասպարյանը և հավելել, որ հետագայում ընդլանվել է թե՛ գործարանը, և թե՛ տեսականիները, մասնավորապես՝ ոչ ալկոհոլային խմիչքների (լիմոնադների), հրուշակեղենի, գինու ու վերջերս շուկայում վաճառքի հանված սառը թեյի և սուրճի արտադրությունը:
«Մարտունու շրջանում աճող ավելի քանի 2000 տարեկան հայտնի հսկա ծառի անունով ձեռնարկությունն անվանել էինք «Տնջրի 2000»»,- ավելացրել է Հ. Գասպարյանը:
Այսօր ընկերությունն առաջարկում է հացաբուլկեղենի՝ 6, հրուշակեղենի՝ 7-8 և լիմոնադի՝ 8 տեսակ. Արտադրանք. դրանց վաճառքը հիմնականում իրականացվում է Արցախի շրջաններում և Ստեփանակերտում:
Վերջերս ընկերությունը սկսել է նաև արտադրել գինիների լայն տեսականի: Հ. Գասպարյանը նշել է, որ, ունենալով խաղողի այգիներ և գինու պատրաստման մեծ փորձ, որոշել է սեփական արտադրանքը ներկայացնել շուկայում:
Նա ավելացրել է նաև, որ, շնորհիվ «Թրփանճեան գյուղական համայնքների զարգացման ծրագրի», ձեռնարկատիրությունն ունեցել է բիզնեսի կառավարման համար անհրաժեշտ պրոֆեսիոնալ գիտելիքներ և հմտություններ: Իսկ դասընթացների ընթացքում տիրապետել են գնումների գործընթացների ստեղծման, դրամական հոսքերի վերահսկման, մարքեթինգային ռազմավարության ձևավորման և հաշվապահական հաշվառման հմտություններին:
«Տարիների ընթացքում գործարանն ունեցել է նաև դժվարություններ, սակայն մեր առաջնային խնդիրն է եղել ապահովել բարձր որակ՝ ուշադրություն դարձնելով նաև ապրանքների փաթեթավորմանն ու ձևավորմանը» նշել է գործարարը և հավելել,- ուրախ ենք, որ կարողանում ենք խթանել տեղական արտադրության իրացումը»:
Ընկերությունն այս պահին ունի մոտ 20 աշխատակից:
50-ամյա Էլզա Դանիելյանի խոսքով՝ արդեն 5-6 տարի է, ինչ աշխատում է որպես հրուշակագործ: «Աշխատանքը հաճելի է, քանի որ դրական ազդեցություն ենք ստանում՝ աշխատելով գործարանում: Շնորհիվ ձեռնարկատերի ունեցած առաջընթացի՝ մենք ևս ոգևորվում ենք ընկերության հաջողություններով»,- ասել է գործարանի աշխատակիցը և հավելել, որ իրենց արտադրած հրուշակեղեններից փախլավան, գաթան, «նապոլեոն»-ը, էկլերը բնակչության կողմից մեծ պահանջարկ ունեն: