«Հայաստան» համահայկական հիմնադրամի հեռուստամարաթոնն այս տարի կանցկացվի նոյեմբերի 27-ին և ինչպես նախորդ, այնպես էլ այս տարվա մարաթոնի գլխավոր խնդիրը Վարդենիս-Մարտակերտ ճանապարհի կառուցման համար գումարներ հավաքելն է, այս մասին Tert.am-ի հետ զրույցում տեղեկացրեց հիմնադրամի գործադիր տնօրեն Արա Վարդանյանը:
Հեռուստամարաթոնի հիմնական նպատակն այս տարի ևս Վարդենիս-Մարտակերտ ճանապարհի կառուցումն է
ՍՏԵՓԱՆԱԿԵՐՏ, 7 ՆՈՅԵՄԲԵՐԻ, ԱՐՑԱԽՊՐԵՍ: «Ճանապարհի ընդհանուր երկարությունը մոտ 116 կմ է, որից 16-ը Հայաստանի տարածքում է: Այդ 16 կմ-ի թե՛ հողային, թե՛ ասֆալտապատման աշխատանքների ամբողջ արժեքը փոխհատուցել է ՀՀ կառավարությունը՝ շուրջ 1 մլրդ 600 մլն դրամ, և այդ աշխատանքները մոտենում են ավարտին, այսինքն՝ Հայաստանի հատվածը կարող ենք ասել, որ 80%-ի չափով ասֆալտապատված է: Ինչ վերաբերում է ԼՂՀ հատվածին, ապա այս տարվա վերջին կավարտենք հողային աշխատանքները, այսինքն՝ առաջին փուլը, որի վրա ծախսվում է մոտ 10 մլն ԱՄՆ դոլարին համարժեք դրամ: Ամբողջ ճանապարհն ավարտին հասցնելու համար մեզ անհրաժեշտ է 17 մլն դոլար»,- ասաց նա:
Արա Վարդանյանը նշեց, որ բացի ճանապարհի շինարարությունից, հեռուստամարաթոնի ընթացքում ներկայացվելու են բազմաթիվ հատուկ ծրագրեր: Նա նաև նշեց նախորդ տարի իրականացված նմանատիպ հատուկ ծրագրեր, որոնք նաև կներկայացվեն առաջիկա հեռուստամարաթոնին:«Օրինակ՝ Երևանում Չայկովսկու անվան երաժշտական դպրոցի ամբողջական վերակառուցման ծրագիրը շատ կարևոր է. միակ հանրակրթական պրոֆեսիոնալ երաժշտական դպրոցն է և շատ կարևոր էր, որ կարողացանք գտնել մարդկանց, ովքեր համաձայնեցին ֆինանսավորել այդ դպրոցի վերակառուցումը 1.5-2 մլն եվրոյի շրջանակում»,– ասաց նա:
Արա Վարդանյանի խոսքով՝ նման ծրագիր է Ստեփանակերտում օնկոլոգիական կենտրոնի շինարարությունը և համալրումը սարքավորումներով, որը Ֆրանսիայից մի բարերար է օժանդակել և չի ցանկանում, որ իր անունը նշվի։«Բայց մեծ ծրագիր է իրականացնում՝ 2 մլն եվրոյից ավելի գումարի շրջանակում: Հայաստանում Հնդկաստանի կառավարության ֆինանսավորմամբ Վայոց Ձորի դպրոցներում ստեղծելու ենք համակարգչային դասարաններ, ամբողջ տեխնիկան տրամադրելու է Հնդկաստանի կառավարությունը»,- տեղեկացրեց նա:
Հարցին, թե ինչպես նախորդ վերջին տարիներին, կա՞ն որոշ բարերարների ու գործարարների հետ պայմանավորվածություններ հեռուստամարաթոնի ընթացքում գումար փոխանցելու մասին, նա պատասխանեց, որ այս պահի դրությամբ որևէ պայմանավորվածություն չկա, գոնե իրեն հայտնի չէ։«Չեմ կարող ասել, գուցե բարձր մակարդակի վրա ինչ-որ համաձայնություններ կան, բայց ես չեմ տիրապետում, ամեն ինչ հայտնի կդառնա բուն մարաթոնի ընթացքում… Շատ կարևոր է, որ հեռուստամարաթոնի ընթացքում մենք ունենանք հատուկ նվիրատուներ հենց ճանապարհի համար և այդ առումով կուզեմ դիմել լայն հասարակությանը, խնդրելով որպեսզի բոլորն իրենց հնարավորությունների սահմաններում մասնակից լինեն ծրագրին»,– ավելացրեց նա:
Ինչ վերաբերում է նախորդ տարվա հեռուստամարաթոնին հավաքված և տարբեր ծրագրերի իրականացման համար ծախսված գումարներին, ապա Արա Վարդանյանը նշեց, որ հավաքված շուրջ 21 մլն դոլարից հիմնադրամի հաշվին է փոխանցվել դեռևս 16.5 մլն դրամը:
«4.5 մլն դոլար դեռևս հավաքման պրոցեսում է, այսինքն` ոչ թե չենք ստանալու, այլ կան խոշոր նվիրատուներ, որոնց նվիրատվությունները մեզ փոխանցվում են մաս-մաս, հենց նրանք են այդ տարբերակը ընտրել, քանի որ գումարը ուղղվում է շինարարությանը, իսկ ինչպես գիտենք շինարարությունները փուլային ձևով են իրականացվում ամբողջ գումարը միանգամից անհրաժեշտ չի լինում»,-ասաց նա:
