Վարդենիս-Մարտակերտ ավտոճանապարհը վերջին տարիներին «Հայաստան» համահայկական հիմնադրամի իրականացրած կարեւոր նախագծերից մեկն է։
Վարդենիս-Մարտակերտ ճանապարհը «Հայաստան» հիմնադրամի կարեւորագույն նախագիծն է. Կանադայի ներկայացուցիչ
ՍՏԵՓԱՆԱԿԵՐՏ, 27 մայիսի, ԱՐՑԱԽՊՐԵՍ: Մայիսի 27-ին NEWS.am –ի թղթակցի հետ զրույցում նման կարծիք է հայտնել «Հայաստան» համահայկական հիմանդրամի Տորոնտոյի (Կանադա) մասնաճյուղի ղեկավար Մկրտիչ Մկրտչյանը։
Նա նշել է, որ Վարդենիս-Մարտակերտ մայրուղին Արցախի Հանրապետությունը Հայաստանին եւ արտաքին աշխարհին կապող երկրորդ ավտոճանապարհն է, ուստի դրա նշանակությունը չի կարելի թերագնահատել։ Ավելին, այդ ճանապարհն արդեն կարեւոր դեր է խաղացել ապրիլյան պատերազմի ժամանակ՝ ապահովելով Հայաստանի եւ Արցախի միջեւ արագ տեղաշարժը։
Նշենք, որ Վարդենիս-Մարտակերտ մայրուղին 116 կմ է եւ անցնում է Արցախի Հանրապետության հյուսիսային հատվածով՝ Շահումյանի ու Մարտակերտի շրջաններով։ Մայրուղու կառուցումը մոտ 35 մլն դոլար է արժեցել։ Այդ գումարը հավաքվել է հեռուստամարաթոնի եւ աշխարհի մի շարք երկրներում այլ ակցիաների շնորհիվ։
Ինչ վերաբերում է Համահայկական հիմնադրամի կողմից ֆինանսավորվող այլ նախագծերին, Մկրտիչ Մկրտչյանը նշել է Արցախի Հանրապետությունում բազմազավակ ընտանիքնրի համար տների կառուցումը, դպրոցների ու համայնքային տների կառուցումը եւ, իհարկե, հիվանդանոցների կառուցումն ու վերանորոգումը։ Հիմնադրամի ներկայացուցչի կարծիքով՝ այս բոլոր նախագծերը շատ կարեւոր են եւ կյանքն ավելի բարեկեցիկ են դարձնում։
Երեւանում, Հայաստանի կառավարության ընդունելությունների տանը մայիսի 27-ին բացվել է «Հայաստան» համահայկական հիմնադրամի հոգաբարձուների խորհրդի եւ տեղական մարմինների 26-րդ նիստը։ Նիստին ներկա են Հայաստանի եւ Արցախ նախագահներ Սերժ Սարգսյանն ու Բաքո Սահակյանը, ՀՀ վարչապետ Կարեն Կարապետյանը, Կառավարության անդամներ եւ սփյուռքի հյուրեր։