Անցած տարվա ընթացքում հանրապետությունում համաճարակաբանական իրավիճակը եղել է համեմատաբար կայուն:
Համաճարակաբանական իրավիճակը եղել է համեմատաբար կայուն. Կարինե Աթայան
ՍՏԵՓԱՆԱԿԵՐՏ, 25 հունվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ հունվարի 25-ին կայացած մամուլի ասուլիսին ասել է ԱՀ առողջապահության նախարար Կարինե Աթայանը՝ ավելացնելով, որ կանխարգելման և հակահամաճարակային միջոցառումների իրականացման արդյունքում հանրապետությունում չեն գրանցվել որովայնային տիֆի, պարատիֆերի, մալարիայի, խոլերայի, վիրուսային հեպատիտ Ա-ի, սիբիրյան խոցի դեպքեր:
«Կանխարգելիչ պատվաստումների իրականացման շնորհիվ 2017 թվականին հանրապետության տարածքում չեն գրանցվել կառավարելի վարակներ` պոլիոմիելիտ, կարմրուկ, կարմրախտ, խոզուկ, դիֆտերիա, փայտացում, կապույտ հազ: 2016-2020 թվականների իմունիզացիայի ԱՀ պետական ծրագրի իրականացման շրջանակներում 2017 թվականին Հայաստանի Հանրապետության առողջապահության նախարարության «Հիվանդությունների վերահսկման և կանխարգելման ազգային կենտրոն» ՊՈԱԿ-ի կողմից բարեգործական հիմունքներով տրամադրվել է համապատասխան չափի պատվաստանյութ, ներարկիչներ, այրման տուփեր, ինչը բավարարել է Արցախի բնակչության, այդ թվում նախազորակոչիկների և զորակոչիկների իմունիզացիայի ամբողջ պահանջարկը»,- նշել է Կ. Աթայանը:
Նախարարի խոսքով՝ հաշվի առնելով, որ Արցախը համարվում է էնդեմիկ գոտի լեյշմանիոզ հիվանդության նկատմամբ (2017 թվականին գրանցվել է ընդերային լեյշմանիոզի 18 դեպք՝ հիմնականում նախադպրոցական տարիքի երեխաների շրջանում), Արցախի առողջապահության նախարարության պետական հիգիենիկ և հակահամաճարակային տեսչության «Համաճարակաբանության և հիգիենայի կենտրոն»-ի մասնագետների կողմից հիվանդության կանխարգելման նպատակով կազմակերպվել են տարբեր հակահամաճարակային (դեզինֆեկցիոն, դեզինսեկցիոն, դեռատիզացիոն) միջոցառումներ, որը կշարունակվի իրականացվել նաև հետագա տարիներին:
Անդրադառնալով վերին շնչառական ուղիների ու գրիպի համաճարակաբանական իրավիճակին՝ Կ. Աթայանը նշել է, որ իրավիճակը հսկելու և ժամանակին կանխարգելիչ միջոցառումներ իրականացնելու նպատակով աշնան և ձմռան ամիսներին նախարարության կողմից կատարվում է ամենօրյա մշտադիտարկում: Համաձայն նախարարության համապատասխան գրության՝ բուժհիմնարկների ամբուլատոր ծառայությունների կողմից կատարվում են բակային համայցեր՝ հիվանդների վաղ հայտնաբերման նպատակով:
Արցախի առողջապահության նախարարության աշխատակազմի պետական հիգիենիկ և հակահամաճարակային տեսչության մասնագետների կողմից հաշվետու տարում ստուգումներ են կատարվել ԼՂՀ տարածքում գործող 85 օբյեկտներում, այդ թվում` կոմունալ, սննդի օբյեկտներում, նախադպրոցական հիմնարկներում. ստուգումներ են իրականացվել նաև լիցենզավորման ենթակա օբյեկտներում և տրվել է համապատասխան հիգիենիկ եզրակացություն:
Իրականացվել են համալիր ստուգումներ ենթակա բուժհիմնարկներում, ի հայտ եկած թերությունները քննարկել տեղերում և տրվել մեթոդական ցուցումներ:
