Նոյեմբերի 11-ին Օքսֆորդի համալսարանի Սուրբ Անտոնի քոլեջում եվրոպական մի շարք համալսարանների եւ հետազոտական կենտրոնների ներկայացուցիչների, դիվանագետների եւ փորձագետների, ինչպես նաեւ հակամարտող կողմերի ներկայացուցիչների մասնակցությամբ կայացել է Լեռնային Ղարաբաղի հակամարտությանը նվիրված խորհրդաժողով:
Արցախցի խորհրդարանականը Օքսֆորդում խոսել է բանակցային գործընթացում ԼՂՀ-ն՝ որպես լիիրավ կողմ վերականգնելու մասին
ՍՏԵՓԱՆԱԿԵՐՏ, 25 ՆՈՅԵՄԲԵՐԻ, ԱՐՑԱԽՊՐԵՍ: «Միջազգային եւ տարածաշրջանային զարգացումների ազդեցությունը ղարաբաղյան հիմախնդրի կարգավորման վրա» խորագրով խորհրդաժողովը կազմակերպել էր «Երկխոսություն, անալիզ եւ հետազոտություն կենտրոն»,-ը (LINKS) եւ Ռուսաստանի, Եվրասիայի հետազոտության կենտրոնը:
Խորհրդաժողովում Արցախի Հանրապետությունը ներկայացրած ԼՂՀ ազգային ժողովի արտաքին հարաբերությունների մշտական հանձնաժողովի փոխնախագահ Սերգեյ Ղազարյանը «Արցախպրես»-ի թղթակցի հետ զրույցում նշել է, որ նշված միջոցառման գրեթե բոլոր մասնակիցների ելույթների ուղղվածությունը կայանում էր ադրբեջանաղարաբաղյան խաղաղ կարգավորման այլընտրանքայնության բացակայության մեջ: Զեկուցողները բազմիցս ընդգծել են, որ, առանց փոխվստահության մթնոլորտի ձևավորման, անհնար է բանակցային գործընթացում որևէ առաջընթաց ակնկալել:
Հայկական կողմերի ներկայացուցիչների ելույթներում էլ նշվել է, որ անհապաղորեն Մինսկի խմբի շրջանակներում ընթացող բանակցություններին՝ որպես լիիրավ կողմ, անհրաժեշտ է ապահովել ԼՂՀ-ի մասնակցությունը: Ադրբեջանը պետք է վերջ տա իր ապակառուցողական քաղաքականությանը՝ չհրաժարվելով նախկինում ձեռք բերված համաձայնագրերի պահանջներից, մասնավորապես՝ հրադադարի և հրադադարի ռեժիմի ամրապնդման համաձայնագրերի պահպանման անհրաժեշտությունից:
Միջոցառմանը հաջորդած ադրբեջանական կողմի հերթական սադրանքը՝ կապված ադրբեջանաղարաբաղյան զինված ուժերի շփման գծում ուսումնավարժական թռիչք իրականացնող ուղղաթիռի խոցման հետ, հերթական անգամ ցույց տվեց, որ, ցավոք, Ադրբեջանը մտադիր չէ հրաժարվել սադրանքներից և սահմանին իրավիճակը սրելուց:
Անդրադառնալով լրատվամիջոցներում տեղ գտած միջոցառման մասնակիցների ձևաչափի խախտման մասին տեղեկություններին՝ Ս. Ղազարյանը նշել է, որ ադրբեջանական կողմի և ադրբեջանամետ որոշ շրջանակների փորձերը՝ իրականությունը ներկայացնելու ցանկացածի տեղ, զուրկ են իրական որևէ հիմքից: Անդրադառնալով միջոցառման կազմակերպիչներից մեկի՝ Դեննիս Սամմութի՝ «Նույն մեդալի երկու կողմերը» հրապարակմանը, որտեղ հեղինակը փորձել է հայ- ադրբեջանական կողմի նման հակամարտությունը ներկայացնել որպես միջհամայնքային ընդհարում, արցախցի խորհրդարանականը, հակադարձելով նրան, նշել է, որ վերջին տարիներին նման փորձեր բազմիցս են ձեռնարկվել: «Ադրբեջանաղարաբաղյան հակամարտության, կողմերի միջև երկխոսության գործընթացի հաստատման ճանապարհին նման քայլերն անհեռանկարային են և ծայրաստիճան ապակառուցողական: Հրապարակման մեջ տեղ գտած որոշ ձևակերպումներ խեղաթյուրում են բանակցային ձևաչափը՝ վտանգի տակ դնելով և ստվեր գցելով բազմաթիվ կառույցների օգտակար և կառուցողական նախաձեռնություններին, որոնք ուղղված են հակամարտության համատեղ լուծման ուղիների որոնմանը»,-եզրափակել է խոսքը Սերգեյ Ղազարյանը: