Աշխարհի գործող չեմպիոններ Արթուր Ալեքսանյանը եւ Մաքսիմ Մանուկյանը վստահ հաղթանակով մեկնարկեցին Ռուսաստանի Կասպիյսկ քաղաքում շարունակվող հունահռոմեական ըմբշամարտի Եվրոպայի առաջնությունում:
ԵԱ. Արթուր Ալեքսանյանի եւ Մաքսիմ Մանուկյանի վստահ մեկնարկը
ՍՏԵՓԱՆԱԿԵՐՏ, մայիսի 1, ԱՐՑԱԽՊՐԵՍ: Ռիո-2016 օլիմպիական չեմպիոն Արթուր Ալեքսանյանը 97 կգ քաշային կարգում պայքարը սկսեց 1/8 եզրափակիչից, որտեղ 1 րոպե 40 վայրկյանում հաղթեց Իսրայելը ներկայացնող հայազգի Ռոբերտ Ավանեսյանին: Կիսաեզրափակիչի ուղեգիրը գյումրեցի ըմբիշը կվիճարկի հույն Լոակրատիս Կեսիդիսի հետ, հայտնում է sport.news.am-ը:
82 կգ քաշային կարգում Մաքսիմ Մանուկյանը եւս մեկնարկեց 1/8 եզրափակիչից՝ տուշեով հաղթելով խորվաթ Բոզո Ստարչեւիչին: Հաջորդ գոտեմարտում Մանուկյանը կմրցի Դանիել Ալեքսանդրով (Բուլղարիա) - Էմրահ Կուշ (Թուրքիա) զույգի հաղթողի հետ:
Կարեն Ասլանյանը 67 կգ քաշային կարգում մեկնարկեց 1/8 եզրափակիչից եւ 5:0 հաշվով ուժեղ գտնվեց սերբ Մատե Նեմեշից: Քառորդ եզրափակիչում Ասլանյանը կհանդիպի ռուս Արտյոմ Սուրկովի հետ:
60 կգ քաշային Արմեն Մելիքյանը 1/8 եզրափակիչում մեկնարկեց մոլդովացի Վիկտոր Ցիոբանուի նկատմամբ 8:7 հաշվով հաղթանակով: Մելիքյանի հաջորդ մրցակիցը կլինի վրացի Դաթո Չխարտիշվիլին:
Հիշեցնենք, որ Եվրոպայի առաջնության առաջին օրը պայքարի մեջ մտած Հայաստանի 3 ներկայացուցիչներ Սլավիկ Գալստյանը (63 կգ), Կարապետ Չալյանը (77 կգ) եւ Արթուր Շահինյանը (87 կգ) մեդալ չէին նվաճել: Արթուր Շահինյանը հնարավորություն էր ստացել պայքարել բրոնզե մեդալի համար եւ մայիսի 1-ին մասնակցեց սփոփիչ գոտեմարտերի: Առաջին սփոփիչ գոտեմարտում նա 7:0 հաշվով հաղթեց լիտվացի Ջուլիուս Մատուզեւիչիուսին, սակայն երկրորդում 3:7 հաշվով պարտվեց գերմանացի Դենիս Կուդլային եւ լքեց պայքարը: Բրոնզե մեդալի համար գոտեմարտում Դենիս Կուդլայի մրցակիցը կլինի ադրբեջանցի Իսլամ Աբասովը:
Եվրոպայի առաջնությանն անցկացվում է նոր կանոնակարգով, եւ ըմբիշները կշռվում են մրցագորգ դուրս գալուց 2 ժամ առաջ: