Տեղեկատվական անվտանգության հարցերի փորձագետ Սամվել Մարտիրոսյանն այսօր լրագրողների հետ հանդիպման անդրադառնալով ադրբեջանցի հաքերների պարբերական հարձակումներին՝ նշում է, որ տարի չի եղել, որ հունվարի 20-ին և փետրվարին՝ Խոջալուի դեպքերի հետ կապված չլինեն հարձակումներ ադրբեջանական կողմից:
Ադրբեջանցի հաքերների հարձակումների շրջանը սկսվում է. Սամվել Մարտիրոսյան
ՍՏԵՓԱՆԱԿԵՐՏ, 13 ՀՈՒՆՎԱՐԻ, ԱՐՑԱԽՊՐԵՍ:Սամվել Մարտիրոսյանի պնդմամբ՝ ադրբեջանցի հաքերների կողմից ամենահաճախը «կոտրվում են» Հայաստանի երկրորդական կայքերը, որոնք ավելի քիչ պաշտպանված են: Նրա հավաստմամբ`մեր երկրում ամենապաշտպանվածը արտաքին գերատեսչության ու նախագահի պաշտոնական կայքերն են:
«Մյուս բոլոր կայքեր բավական հաճախ են ջարդվում: Շատ դեպքերում նաև այնպիսի տպավորություն է, որ կայքի ղեկավարությունը տեղյակ չէ, որ իրենց կայքը ջարդվել է»,- նշեց մասնագետը:
«Մի բան է, երբ ջարդվում է որևէ ռաբիս երգչի կայք, մեկ այլ բան է, երբ ջարդվում է պետական կառույցի կամ այլ կարևորություն ունեցող կայք»,- նկատեց նա:
Անդրադառնալով ռուսական լրատվամիջոցների՝ երեկ Գյումրի քաղաքում տեղի ունեցած դեպքի արձագանքին, Սամվել Մարտիրոսյանն ասաց. «Եթե ընդհանուր նայենք, կտեսնենք, որ այդ իրադարձությունների մասին առաջին լուրերը գնացին հիմնականում գործակալություններից, ավելի մանրամասն տեղեկություններ չէին հրապարակվում ռուսական մամուլում: Պաշտպանության նախարարության ու արտգործնախարարության արձագանքից հետո միայն ռուսական մամուլը սկսեց գրել: Ակնհայտ երևում էր, որ ինչ-որ վերահսկողություն կար այդ հարցում»:
