Այս տարվա բերքահավաքի տակ Մարտունու շրջանում աշնանացան հացահատիկայինների 13854 հա ցանքս է կատարվել` նախորդ տարվա 10470 հա-ի փոխարեն:
Մարտունու շրջանում աշնանացանի ծավալները գերազանցել են նախորդ տարվա ցուցանիշները
Այս տարվա բերքահավաքի տակ Մարտունու շրջանում աշնանացան հացահատիկայինների 13854 հա ցանքս է կատարվել` նախորդ տարվա 10470 հա-ի փոխարեն:
Այդ մասին «Արցախպրես»-ին հայտնեց Մարտունու շրջվարչակազմի աշխատակազմի հողօգտագործման և հողաշինարարության բաժնի պետ Միքայել Բաբայանը` նշելով, որ չնայած անցած տարի շրջանը մեծ վնասներ էր կրել կարկտահարությունից ու երաշտից, բայց այս տարի աշնանացանի ցուցանիշները գերազանցել են նախորդ տարվան: Խոսելով 2013թ-ի բերքահավաքի արդյունքներից` Մ.Բաբայանը նշեց, որ հացահատիկային մշակաբույսերի համախառն բերքատվությունը կազմել է 19.452 տոննա, կամ հեկտարից միջինը 18,6 ցենտներ: «Բավարար ցուցանիշներ են գրանցվել նաև խաղողագործության ոլորտում, մասնավորապես` շրջանի 116,85 հա-ի հասնող խաղողայգիներից շուրջ 9.733,5 տոննա խաղող է մթերվել, որի միջին բերքատվությունը կազմել է 83,6 ցենտներ հեկտարից»,- ասաց Մ. Բաբայանը:
Անդրադառնալով ընթացիկ տարվա ծրագրերին` բաժնի պետը նշեց, որ ԼՂՀ կառավարության կողմից մշակված ծրագրով 2014թ-ին Մարտունու շրջանի վերին ենթաշրջանի 20 համայնքներում բազմամյա մշակաբույսերի ցանքատարածությունների ընդլայնման և հողերի արդյունավետ օգտագործման նպատակով հատկացվել է 26590 լիտր դիզվառելիք և 13 մլն.290 հազ. դրամի չափով ֆինանսական աջակցություն` բազմամյա մշակաբույսերի` մասնավորապես կորնգանի և առվույտի ցանքատարածություններն այս տարի 230 հեկտարով ընդլայնելու համար, որոնք անցած տարում 380 հեկտար էին կազմում:
Նախորդ տարվա կարկտահարություններից և երաշտից տուժել են շրջանի ավելի քան 21175 հա ցանքատարածություններ` ներառյալ նաև 61,086 հա վնասված խաղողայգիներ: ԼՂՀ կառավարության 2013թ. որոշման համաձայն 100 տոկոսով վնասված խաղողայգիների սեփականատերերին յուրաքանչյուր հեկտարի դիմաց 100 հազարական դրամի չափով միանվագ աջակցություն է ցուցաբերվել, ինչպես նաև հողօգտագործողները երկու տարով ազատվել են հողի հարկերից և վարձավճարներից:
