Ռուս միլիոնատեր Գերման Ստերլիգովը, ով ընտանիքի հետ տեղափոխվել է Լեռնային Ղարաբաղ, այս օրերին գտնվում է Մոսկվայում։
Գերման Ստերլիգովը Մոսկվա է մեկնել՝ ապացուցելու, որ իրավապահներից չի թաքնվում
ՍՏԵՓԱՆԱԿԵՐՏ, ՀՈՒԼԻՍԻ 19, ԱՐՑԱԽՊՐԵՍ: Tert.am-ի փոխանցմամբ՝ գործարարը «ВКонтакте» կայքում ուղերձ է հղել ռուսական և ադրբեջանական ԶԼՄ-ների խմբագիրներին։
Ստերլիգովը գրել է,- «Ադրբեջանական և ռուսական մամուլի մի մասը մի ամբողջ շաբաթ զրպարտել է ինձ՝ ասելով, որ ես «փախել եմ Լեռնային Ղարաբաղ», այնտեղ թաքնվել ՌԴ-ի ոստիկանությունից։ Որևէ բան ապացուցելու փոխարեն ես որոշել եմ ցրել զրպարտանքներն ամենապարզ միջոցով՝ մի քանի օրով վերադառնալ Ռուսաստան»։
Նախորդ շաբաթ ԼՂ-ում կայացած մամուլի ասուլիսի ժամանակ նա տեղեկացրել է8 Ռուսաստանի իրավապահ մարմիններին 3 օրով Մոսկվա վերադառնալու մասին։ Հեռուստանընկերությունները և թերթերն այդ մասին տեղեկացրել են միլիոնավոր ռուսներին։
Ստերլիգովը ժամանել է Մոսկվա և ճեպազրույց ունեցել օդանավակայանում, այնուհետև հանդիպել է տարբեր մարդկանց հետ, հարցազրույցներ տվել, ելույթ ունեցել ուղիղ եթերում, մոտ 100 հյուր ընդունել իր տանը։
«Լրանում է իմ՝ Մոսկվայում գտնվելու 3-րդ օրը, և ես հայտնում եմ, որ ՌԴ-ի իրավապահ մարմիններն իմ հանեպ ոչ մի հետաքրքրություն չեն ցուցաբերել։ Թեման համարում եմ փակված և վերադառնում Ղարաբաղ՝ կնոջս և երեխաներիս մոտ»,- գրել է Ստերլիգովը։
Դիմելով Իսրայելի և Ադրբեջանի ներկայացուցիչներին՝ ռուս գործարարը նշել է, որ «թքած ունի» նրանց սադրանքների վրա, ովքեր փորձում են օգտագործել իրավական մեխանիզմները և թույլ չտալ նրա վերադարձը Ղարաբաղ։
