ՌԴ գործարար Գերման Ստերլիգովը, ով Լեռնային Ղարաբաղի Հանրապետությունից Մոսկվա վերադառնալուց անմիջապես հետո ձերբակալվել էր օդանավակայանում, այնուհետ ազատ արձակվել:
Ադրբեջանցի քննիչները թող իրենց կանանց հետ շփվեն
ՍՏԵՓԱՆԱԿԵՐՏ, սեպտեմբերի 2, ԱՐՑԱԽՊՐԵՍ : Комсомольская правда թերթի փոխանցմամբ՝ գործարարը նշել է, որ ձերբակալությունը եղել է Ադրբեջանի նախաձեռնությամբ, սակայն նա բաց է թողնվել, քանի որ Ռուսաստանի քաղաքացի է։
Այն հարցին, որ ռուս գործարարը, կարծես, շատ է բարկացրել պաշտոնական Բաքվին՝ այցելելով ԼՂՀ, և դրա պատճառով քննիչներ են մեկնել ՌԴ՝ նրա հետ շփվելու համար, և արդյոք նա ցանկանում է տեսնել նրանց, Ստերլիգովը պատասխանել է. «Նրանք, որքան ցանկանում են, կարող են շփվել իրենց ադրբեջանցի կանանց հետ։ Դա նրանց գործն է։ Ես Ռուսաստանի քաղաքացի եմ, և մինչ ռուսական իրավապահ մարմինները չցանկանան, որ ես որևէ մեկի հետ շփվեմ՝ ես ոչ մեկի հետ չեմ հանդիպի։ Նման առաջարկներով ինձ ոչ ոք դեռ չի դիմել»։
Գործարարը նշել է, որ ինքը ոչ այնքան հանդուրժող վերաբերմունք ունի թշնամիների նկատմամբ։ Նրա խոսքով, սակայն, նա միշտ ուրախ է ընկերներին։
«Ե՛վ սեղան կգցենք, և՛ անկողին կտանք, իսկ նրանց հետ, ովքեր ցանկանում են քանդել մեր կյանքը, մենք առանձնապես չենք շփվում։ Այլ երկրների քննիչներն ինձ՝ որպես ՌԴ քաղաքացու, այսօր հետաքրքրում են այնքան, որքան այլմոլորակայինները. ես անտարբեր եմ»,- հայտարարել է Ստերլիգովը։
Այս պատմությունից հետո Լեռնային Ղարաբաղի հանդեպ դիրքորոշման պահպանման վերաբերյալ հարցին գործարարը պատասխանել է, որ այդ ամենը ներկայացված է իր դասագրքում, որը հրապարակված է իր կայքում։ Ադրբեջանը պահանջում է ջնջել այն համացանցից, սակայն գործարարը չի պատրաստվում դա անել, և իր կարծիքը կպնդի նաև հետագայում։
Հիշեցնենք, որ վերջին շրջանում Լեռնային Ղարաբաղում բնակված գործարարի փաստաբանը երեկ հայտնել էր, որ Մոսկվա ժամանելուց անմիջապես հետո Ստերլիգովը ձերբակալվել է ՌԴ սահմանապահ ծառայության աշխատակիցների կողմից։ Փաստաբանը ենթադրել է, որ դա կապված է նրա հետ, որ Ադրբեջանի իշխանությունները գործարարի նկատմամբ հետախուզում են հայտարարել՝ «սահմաններն անօրինական հատելու համար»:
Նշվում էր նաև, որ Ադրբեջանի ՆԳՆ և Գլխավոր դատախազության աշխատակիցներից կազմված օպերատիվ-քննչական խումբը մեկնել է Մոսկվա՝ ռուս գործարար Գերման Ստերլիգովին հարցաքննելու նպատակով։