Այսօր Արցախի պետական համալսարանի ռեկտոր Մանուշ Մինասյանը հանդիպել է առաջին կուրսեցիների հետ:
Ո՞ր ուսանողներին կրթաթոշակ կտրամադրվի
ՍՏԵՓԱՆԱԿԵՐՏ, սեպտեմբերի 18, ԱՐՑԱԽՊՐԵՍ։ Արցախի պետական համալսարանի պաշտոնական կայք էջի փոխանցմամբ՝ շնորհավորելով մայր բուհի ուսանողի կոչմանն արժանանալու կապակցությամբ` Մ. Մինասյանը ներկաներին հավաստիացրել է, որ բուհի բոլոր ստորաբաժանումները, առաջնորդվելով կրթության որակի բարելավման և ուսանողամետ ուսուցման կազմակերպման սկզբունքով, պատրաստ են պատշաճ կազմակերպել ԱրՊՀ ուսանողի ուսումնառությունը, որի համար ստեղծված են բոլոր պայմանները` հմուտ պրոֆեսորադասախոսական անձնակազմ, կահվորված լաբորոտորիաներ և կաբինետներ, գիտական և էլեկտրոնային գրադարաններ, ընթերցասրահներ:
«Հանդիսանալով հանրապետության գլխավոր գիտակարթական կենտրոնը` բուհն այսօր նպատակ ունի ոչ միայն թողարկել գիտելիքներով և հմտություններով զինված մասնագետ, այլև հասարակական ակտիվ դիրք ունեցող քաղաքացի, ուստի մեր գործունեությունը չի սահմանափակվելու միայն գիտակրթական առաջընթացի ապահովմանն ուղղված քայլերով»,- նշել է Մ. Մինասյանը: Ռեկտորը ներկաներին հորդորել է անմասն չմնալ բուհի ներքին և արտաքին գործընթացներից և անմիջական մասնակիցը լինել ինչպես ձևավորված ավանդույթների պահպանմանը, այնպես էլ նորերի ձևավորմանը, քանզի «ուսանողամետ ուսուցումը ենթադրում է նաև այդ»:
Բուհի ղեկավարն անդրադարձել է ուսուցման կրեդիտային համարգին, ուսանողների հետ կնքվող պայմանագրերին, ուսանողի իրավունքներին և պարտականություններին, կրթաթոշակների տրամադրման, զեղչերի, հանրակացարանում բնակվելու, դիմում-բողոքների կարգերին և այլն:
Ներկաների ուշադրությունը հրավիրվել է հատկապես կրթաթոշակների տրամադրման կարգին, որի դրույթները բխում են ԼՂՀ կառավարության համապատասխան որոշումից, որում հստակ սահմանված է կրթաթոշակի էությունը. կրթաթոշակը ֆինանսական խրախուսանք է, որը ենթադրում է ակադեմիական առաջադիմություն, պատշաճ վարքագիծ և հասարակական ակտիվություն:
«Հիմք ընդունելով կառավարության որոշումը,- ասել է ռեկտորը,- ընթացիկ ուսումնական տարվանից կրթաթոշակ կտրամադրվի` հաշվի առնելով ոչ միայն ակադեմիական առաջադիմությունը, այլ նաև վարքագիծն ու հասարակական ակտիվությունը»: Ընդհանրացնելով հանդիպումը` Մ. Մինասյանը ներկաներին կոչ է արել ուսումնասիրել գիտխորհրդի կողմից ընդունված կանոնակարգերը, որոնք տեղադրված են համասլասրանի պաշտոնական կայքէջում` asu.am, տեղյակ լինել սեփական իրավունքներին ու պատրականություններին և դրանք կիրառել գործնականում: Հանդիպման վերջում ռեկտորը պատասխանել է ուսանողների հարցերին, հաջողություններ մաղթել համատեղ աշխատանքում:
