Այսօր ԼՂՀ գյուղատնտեսության նախարարությունում տեղի է ունեցել տարածաշրջանում եզակի՝ աշխարհագրական տեղեկատվական համակարգի շնորհանդեսը, որն իրականացվել է «ԼՂՀ ջրային ենթակառուցվածքների տեխնիկական վիճակի հետազոտում և դրանց կառավարման հայեցակարգերի և շահագործման կանոնակարգերի մշակում» գիտական թեմայի շրջանակներում:
Արցախի ջրային ոլորտին նվիրված` ծրագրի շնորհանդես է տեղի ունեցել
ՍՏԵՓԱՆԱԿԵՐՏ, դեկտեմբերի 25, ԱՐՑԱԽՊՐԵՍ: Աշխատանքը ներկայացրել են աշխարհագրական տեղեկատվական համակարգի մասնագետ, հիդրոլոգ Ալեքսանդր Առաքելյանը և ՀՀ Ճարտարապետության եվ շինարարության Հայաստանի ազգային համալսարանի (ՀՀ ՃՇՀԱՀ) «ՀՇԳՀ և ՀԷԿ» ամբիոնի դասախոս Հովհաննես Քելեջյանը: Նրանք ԼՂՀ ԳՆ ջրային ոլորտի մասնագետների հետ անց են կացրել սեմինար-պարապմունքներ:
«Ծրագիրը շարունակական է, և նախատեսվում է առաջիկա 3 տարիների ընթացքում աշխարհագրական տեղեկատվական համակարգ ստեղծել ԼՂՀ բոլոր շրջանների ջրային ենթակառուցվածքների համար: Այն դինամիկ փոփոխվող թվային միջավայր է, որն անհրաժեշտ է անընդհատ թարմացնել: Այդ նպատակով նախատեսվում է կազմակերպել մասնագետների վերապատրաստման դասընթացներ և ձեռք բերել համապատասխան գործիքային բազա: Սա մեր առաջին քայլն էր այդ համակարգում, հուսով եմ մեզ կհաջողվի ստեղծել գործնական նշանակություն ունեցող տվյալների աշխարհագրական համակարգ, որի հիման վրա կստեղծվի ամբողջ ենթակառուցվածքները ներառող համակարգ»,- նշել է ԼՂՀ ԳՆ փոխնախարար Գևորգ Վերանյանը:
Նշենք, որ ծրագրի պատվիրատուն Արցախի կառավարություն է և ՀՀ գիտության պետական կոմիտեն են: