Ստեփանակերտի Մուրացանի անվան քաղաքային գրադարանի տնօրինության նախաձեռնությամբ Շառլ Ազնավուրի անվան մշակույթի կենտրոնում այսօր տեղի է ունեցել Հայաստանի Հանրապետության և Լեռնային Ղարաբաղի Հանրապետության գրողների միության անդամ, արցախցի գրող Ռոբերտ Եսայանի «Քաոս և Լույս» գրքի առաջին հատորի շնորհանդեսը:
Ստեփանակերտում կայացել է Ռոբերտ Եսայանի «Քաոս և Լույս» գրքի շնորհանդեսը
ՍՏԵՓԱՆԱԿԵՐՏ, 8 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` միջոցառմանը բացման խոսքով հանդես է եկել ԼՂՀ գրողների միության նախագահ, գրքի խմբագիր Վարդան Հակոբյանը` նշելով, որ հայ գրական աշխարհում Ռոբերտ Եսայանի քնարերգությունն իր ուրույն տեղն ունի:
«Ռ. Եսայանն ունի իր յուրահատուկ գրական ոճն ու մտածողությունը: Նա կարողանում է բանաստեղծությունը տանել դեպի մարդը, դեպի այն ընթերցողը, ում համար պոեզիան արժեք է: Ռոբերտը գրում է հակիրճ, պատկերավոր. ընդհանրապես նրա բառերն ունեն ներքին պատկեր, ինչը բևեռների հակադրություն է` քաոսից լույս, լույսից քաոս,-ասել է Վ. Հակոբյանը և ընդգծել,- հետաքրքիր երևույթ է Ռոբերտ Եսայանը. նա անկրկնելի է և´ որպես մարդ-անհատականություն, և´ որպես ինքնատիպ բանաստեղծ: Հինավուրց հայրենի հողն ազզատելիս նա հրետանու զինվոր էր, իսկ բանաստեղծությունների հոգևոր աշխարհում «տարածքներ գրավող» բանաստեղծ:
Բանաստեղծ Սոկրատ Խանյանն էլ գրչընկերոջ մասին իր խոսքում մասնավորապես ասել է. « Ինձ համար Ռոբերտը բանաստեղծության անդաստանում հայտնություն է: Նա գրականություն է մտել իր ինքնատիպ ոճով: Նրա քնարերգության առանձնահատկությունն այն է, որ նրա յուրաքանչյուր բանաստեղծություն ունի ենթատեքստ: Նրան հուզում է մեր կյանքի բոլոր իրադարձությունները: Գրողի համար սովորական թվացող երևույթը դառնում է բանաստեղծական մի գեղեցիկ պատկեր: Ռ. Եսայանն ինքն իրեն չի կրկնում: Ինչպիսի՜ գույներ, մարդկային հոգու ելևէջների ու թրթիռների խտացումներ կան, որոնք նա վերցրել է կյանքից ու բերել պոեզիայի աշխարհ»:
Բանաստեղծ Դավիթ Միքայելյանը, խոսելով Ռ. Եսայանի մասին, ասել է, որ բանաստեղծի պոետիկան հագեցած է քնարական զեղումներով, փիլիսոփայական հայեցողությամբ, բնապաշտությամբ, անակնկալ հայտնագործում-հայտնություններով, գեղագիտական նրբին զգացողությամբ, միանգամայն ինքնատիպ տաղաչափությամբ: Շնորհակալություն հայտնելով ներկաներին՝ Ռ.Եսայանը նշել է, թե ինչու է գիրքը վերնագրել «Քաոս և Լույս». «Ժամանակի ընթացքում այս աշխարհում քաոսն ու լույսը գնալով ավելի է ընդգծվում: Քաոսը շատացել է և լույսի պահանջ է զգացվում: Հանուն այդ լույսի եմ վերնագրել գիրքս` «Քաոս և Լույս»:
Միջոցառմանը Շուշիի Մկրտիչ Խանդամիրյանի անվան պետական-դարամատիկական թատրոնի դերասանները հանդես են եկել Ռոբերտ Եսայանի բանաստեղծությունների արտասանությամբ:
Շնորհանդեսին ներկա էին գրողներ, Ռ. Եսայանի պոեզիայի երկրպագուներ և այլք: