Ծխախոտի մշակման զարգացման ուղղությամբ վերջին տարիներին լուրջ ներդրումներ են իրականացվում:
Ծխախոտի համախառն բերքը 62.4 տոկոսով ավելացել է
ՍՏԵՓԱՆԱԿԵՐՏ, փետրվարի 16, ԱՐՑԱԽՊՐԵՍ: Այդ մասին այսօր կայացած մամլո ասուլիսում տեղեկացրել է ԼՂՀ գյուղատնտեսության նախարար Արամ Մխոյանը՝ ներկայացնելով 2015 թվականին գյուղատնտեսության բնագավառում իրականացված աշխատանքները:
«Մասնավորապես, «Մասիս տաբակո» ընկերությունն անցած տարի շարունակել է աջակցել Ասկերանի, Մարտակերտի, Մարտունու շրջանների հողօգտագործողներին՝ ագրոտեխնիկական պահանջներին համապատասխան ծխախոտի մշակության աշխատանքներ կազմակերպելու համար»,-մանրամասնել է գյուղոլորտի ղեկավարը՝ ավելացնելով, որ հաշվետու տարում հանրապետությունում 146.5 հա-ի վրա կատարվել է ծխախոտի մշակություն, ինչը նախորդ տարվա համեմատ ավել է 60.5 հա-ով կամ 70.3 տոկոսով:
Ծխախոտի համախառն բերքը կազմել է 1345 տոննա, որը նախորդ տարվա համեմատ ավելին է 517.0 տոննայով կամ 62.4 տոկոսով: Մեկ հա-ի միջին բերքատվությունն աճել է 13.9 ցետներով կամ 14.4 տոկոսով:
